Cricket World Cup Under 19 Bangladesh an champion

Pathianni zan khan Potchefstroom, South Africa-ah Cricket World Cup Under 19 final khelh a ni a, Bangladesh chuan India chu wicket thuma hnehin a vawi khat nan an champion. 

Ṭhumvarah Bangladesh an chak a, vawm hmasak an thlang. India-in bat hmasain semifinal-a 'hero' Yashasvi Jaiswal bawk rawn che ṭha nawn lehin ball 121-ah run 88 a siam. Amaherawhchu India batsman dang an che thei lo a, Tilak Varma (38) leh Jurel (22) tih lo chu run 10 vaw tling pawh an awm lo.

Bangladesh bowler Avishek Das-a'n wicket thum lain run 40 a pe a, Shoriful Islam (31/2) leh Tanzim Hasan Sakib (28/2) ten wicket hnih ve ve an la. India-in over 47.2-ah run 177 siamin an thi vek.

Bangladesh tan nomawi a hnai a, opener Parvez Hossain Emon-a'n run 47 a siam. Batsman dang che hleithei bik lo mah se captain Akbar Ali a dingnghet a, run 43 siamin a thi lo. Over 41-ah Bangladesh-in wicket sarih an hloh tawh a, run 15 chauh an mamawh. Ruahsur vangin DLS method hman a ni a, target a awlsam sawt.

Bangladesh target chu 170-ah tihhniam a ni a, ball 30-ah run sarih chiah siam an mamawh avangin harsatna nei loin hnehna an chang. Inkhelh banah Bangladesh player-te'n ṭawngkam an duh tui loh avangin boruak sang deuh mah se hnehna an chan miau avangin India player-te'n tih theih an nei lo.