Ibra a hliam na lo hlauh

Thawhlehni zan khan Zlatan Ibrahimovic chawn hliam chu endik a ni a, an beisei aiin a na lo hlauh. AC Milan chuan an striker hi Serie A an khelh zawm leh a nih chuan chhawr leh hman an inbeisei.

Kum 38 mi Ibra hi Thawhṭanni khan club training-na hmunah a inhliam, khawthlang media lam tarlan dan chuan a ke dinglam a hliam a, a chawn bakah keartui a nih theih a vangin Milan tan pawh a inlan thei tawh lo hial mai thei niin an tarlang.

Mahse, endik a nih hnuah a keartui a hliam tel lo tih hriat a ni. Milan chuan thuchhuah siamin, "Zlatan Ibrahimovic chawn dinglam a hliam, a dinhmun hi ni 10 hnuah endik nawn leh a ni ang," an ti.

Swede striker hian January khan thla ruk chhung atan Milan hi a zawm, a club hi league-ah point 36 hmun pui tawhin pasarihna dinhmun an luah mek. Thla hnih vel an chawlh hnuah kar hmasa aṭang khan training an zawm leh tawh a ni.