MotoGP champion Francesco Bagnaia

Francesco Bagnaia chuan MotoGP title a la fel ta, tun season intlansiak hnuhnung ber Valencia Grand Pirx-ah hnehna chang chungin nomawi a chawi - Valentino Rossi leh Marc Marquez te hnung zuiin MotoGP title a zawna la thei pathumna a ni.

Inelna hnuhnung ber neih thlengin champion tur hriat a la ni lo a, nomawi chawi beisei zinga pakhat zawk Jorge Martin erawh intlansiak tir lamah Marc Marquez nen intaiin a chesual a, uiawm takin a beiseina a thamral.

Circuit Ricardo Tormo-a intlansiakah Martin hian hnehna chang se, a chunga awm Bagnaia chu pangana aia hniama a thlen chuan Martin hi champion thei a la ni, amaherawhchu lap rukna lekah a beiseina hi a tawp, theih ni se tlan ṭhat a châk khawp ang.

An inthlauhna kha point 14 a ni a, ṭha taka bul ṭanin parukna aṭangin pahnihnaah a tlan - a hmaah Bagnaia chauh a awm. Mahse, lap hnihnaah che fuh lo deuhin pariatnaah a tlahniam, a hnuah Marquez nena an hun tawnah erawh tlan zui thei a ni ta lo.

Lap hnuhnung ber an tlan meuh chuan Bagnaia hian fal takin hma a hruai tawh, a hnunga awm Johann Zarco leh Brad Binder ten an tibuai phak tawh lo. Tun season intlansiak 20 zingah a vawi sarih nan a chak a, champion nan a tawk bawk.

Ducati rider Bagnaia chuan, "Hnehna ka chan avangin ka lawm a, ka champion avangin ka duhthusam a thleng dik bawk. Tlan hmabak lap panga a la awm khan bike ke hmalam kha thunun a harsa deuh, hlauthawng rilru takin ka tlan hlawhtling hram.

"Kumin ka hun hman dan hi season hmasa nen khaikhin a harsa, a chhan chu ka elpuite chet dan a danglam a, kei ngei pawh ka tlan dan a danglam. Tluk leh din fawmin season kan hmang zo a ni a, a tawp kharna erawh a fuh," tiin a sawi.

Tun season hi Marquez-a'n Repsol Honda bike a khalhna hnuhnung a ni ta bawk a, bike intlansiakna sang bera vawi ruk champion tawh hian season thar aṭang chuan Gresini Racing a zawm ang - season thar tingaihnawmtu zinga mi a ni ngei ang.