Zaninah Inter Village Futsal semifinal

D. Buanga & Sons Inter Village Futsal Tournament 2023 semifinal chu zanin hian Philip Remthanga Indoor Stadium, Tlangnuamah khelh a ni dawn. Inelna hi Mizoram Football Association leh Tlangnuam Games & Sports Association buatsaih a ni a, LPS Vision-ah tihchhuah a ni ang.

Zan dar 6:00-ah Chawnpui leh Sihphir Venghlun te an inkhel dawn a, MFA hnuai club inelnaa nomawi chawi tawh ve ve an ni a, an ṭha ve ve. Chawnpui hian futsal-a India international David Laltlangsanga (Avida) an kawl a, Sihphir Venghlun hi team angin an ṭha thung.

Electric Veng leh Ramhlun Vengthar ten zanin dar 8:00-ah semifinal hnuhnung zawk an khel dawn a, hei hi a hmuhnawm zawk tura beisei a ni. Mizoram aiawh thlenga team tir tawh Electric Veng hi Lalhlimpuia'n (Tat-a) a la ho a, khelh dan nghet ṭha tak an nei bawk. Ramlun Vengthar hian vengchhung futsal league an nei a, MFA Futsal League-a tawnhriat nei ṭha player an kawl bawk avangin Electric Veng aiin an buk a rit hial ang.