Aizawl FC hmachhawn tur Rajasthan

I League-ah Aizawl FC chuan zanin dar 7:00 hian Deccan Arena-ah Rajasthan FC an hmachhawn dawn a, Mizo club tan nomawi beisei pha turin chak a pawimawh hle. Inkhel hi Eurosport-ah en theih tura besei a ni.

Rajasthan hian Sreenidi Deccan khelmual an ṭawm a, Deccan Arena hi Hyderabad-ah a awm. Mizo club pawh hian November 7, Thawhlehni khan Deccan Arena-ah hian Sreenidi Deccan an hmachhawn a, 2-1 a hnehna an chan avangin helai hmunah hian an mikhual tawh lo ang.

Aizawl FC hian player 19 an hruai a, Brazilian defender Gustavo chu hliam vangin an hruai tel lo. RG Stadium-a Namdhari FC an hneh ṭum hian Gustavo hi Lalmuanawma'n (Munez) a rawn thlak a, Republic Veng tlangval hi a chet ṭhat avangin Serbian defender Ivan Maric nen a inkawp mai a rinawm.

AFC tlarhmaah Lalrinzuala a che ṭha a, Serchhip tlangval hian Namdhari laka goal hmahruai a khung hnuah MPL-ah Chanmari lakah goal hmahruai a khung leh bawk. Rinzuala hnunga awm Hnathial tlangval K. Lalrinfela (Mafela) pawh hian hma a sawn chho hle. Chutihrualin hnehna chang tur chuan mual sira awm R. Lalthanmawia (Amawia) leh R. Ramdinthara te an pawimawh leh ang.

Mizo club hian head coach an lakluh loh avangin B. Malsawmzuala hoin an khel leh dawn a, Sawmtea hian I League match li a enkawl aṭangin vawi thum an chak a, a record ṭha tak hi Rajasthan lakah chhunzawm a tum dawn.

Mahse, Aizawl FC hian Delhi FC an zuam sual tawh a, Rajasthan hi table hnuai lama awm ni mah se an fimkhur a ṭul ang. Rajasthan hian tlarhmaah Ghana tan pawha khel tawh Richard Gadze leh Ghanaian tho Richardson Kwaku Denzel te an nei a, fimkhur a ṭul dawn.

Rajasthan hi Mizo tamna an ni a, starting eleven-ah erawh Aizawl FC left back hlui Lalbiakzuala (BT-a) tih loh chu an khel pha meuh lo. Chutihrualin Sairuatkima, Lalchungnunga Chhangte leh Vanlalzahawma te pawhin bench aṭangin khelhna hmun an nei ṭhin bawk.