PSG-in Newcastle an mikhual dawn

Zanin dar 1:30 hian Parc des Princes-ah PSG-in Newcastle United an mikhual dawn. French champion hian St James Park-ah Magpies hi 4-1 ngawtin an hneh lo a, zanin hian phuba lak an tum ang. UEFA Champions League group F inkhel dangah AC Milan leh Borussia Dortmund te San Siro-ah an inhmachhawn bawk dawn.

PSG hian Newcastle an hneh loh hnuah Ligue 1 lamah chak vek mah se Champions League-ah erawh an muala 3-0 an hneh theih AC Milan chu khualmualah 2-1 in an hneh lo. Luis Enrique kaihhruai team tan knockout stage lut turin Magpies hneh hi a pawimawh hle.

French champion hian zanina an inkhelhna tur khelmualah hian Monaco 5-2 zetin an sawp a, player ṭha ho Kylian Mbappe, Goncalo Ramos, Ousmane Dembele leh Randal Kolo Muani ten goal khat liam liam an khung.

Newcastle pawhin sum hmang tam Chelsea chu 4-1 zetin an sawp a, player inhliam ngah mah se Eddie Howe hote hi zuam chi an ni lo ang. English club hian Europe inelnaah bul an ṭan ṭha a, amaherawhchu an match hnuhnung pahnihah Borussia Dortmund an hneh loh ve ve avangin table mawngphahah an awm mek.

Magpies tan zanin inkhel tur hi knockout ang hiala ngaih theih a ni a, chutihrualin AC Milan leh Borussia Dortmund inkhel result-in nghawng lian tak a nei bawk ang.