Sinner hoin Italy an champion

Jannik Sinner chuan Italy tan thil ropui tak a tihsak ta - mipa tennis team hmanga inelna Davis Cup khelh zawh takah Sinner hoin Italy an champion, kum 47 zet a liam hnuah hlawhtlinna an chang leh ta chiah a ni.

Pathianni zan khan Malaga, Spain-ah final khelh niin, singles rubber hmasa zawkah Matteo Arnaldi chuan Alexei Popyrin 7-5, 2-6, 6-4 a hnehin Italy chu dinhmun ṭhaah a dah a, champion tur erawh chuan match khat dang an chak a la ngai thung.

Inkhel pawimawhah Italy tan Sinner a rawn ding chhuak, kum 22 mi hian a khingpui De Minaur lakah harsatna a tawk lo. Set hloh lo 6-3, 6-0 in hnehna a chang a, match thumna khelh ngai loin Italy hi 2-0 in an chak tlang.

Italy an hlawhtlin rual hian Australia erawh an vanduai a kaltluang, a kum zawnin nomawi inchuhnaah a vanduai zawkah an ṭang, nikum khan Canada an ngam lo - season tharah chuan hlawhtlin ngei an duhna a zual ngeiin a rinawm.

World number 4 Sinner chuan, "Kan zavai tan a lawmawm takzet, a hlim pawh kan hlim reng a ni. Semifinal kha thlir kir ta ila, point khat leh pawh hloh ni ila tla thei dinhmunah kan ding a nih kha, tunah erawh kan champion leh ta mai si.

"Kan thawhhona a ṭha em em a, mimal tinin theihtawp kan chhuah takmeuh avangin a tawpah a rah kan seng. Mimal ni loin kan zavaiin kan pawimawh vek," a ti. Semifinal inkhel hmuhnawmah Sinner hian world number 1 Novak Djokovic a hneh.

Italian tlangval hian kuminah match 64 zetah hnehna a chang tling a, ṭum 15 chu a chak lo zawkah a ṭang thung. World number 4 ni chungin kum tawp a hmang thei dawn a, tennis a khelh hun chhunga kum tawp a hman ṭhat ber ṭum a ni.

A vanduai lama ṭang Australia player De Miuaur chuan, "A zawna vawi hnih final-a chak lo ram hi chu an la awm ngai lo ang, nikum ang bawkin kuminah pawh ramtiam thleng ṭep mah ila kan thleng zo leh ta lo.

"Kan tawpna tur erawh a ni lo a, tun aia ṭha zawk hian Davis Cup hi kan la khel leh ngei ang tih ka chiang a, player neih dan thlir phei chuan hmabak êng tak kan nei niah ka ngai," tiin a sawi.

Kumin atan tennis season pawimawh chin a zo a, tunah chuan season thar inbuatsaihna lam an hawi leh ṭan tawh ang. January thla maiah Australian Open khelh a nih dawn avangin December thlaah inbuatsaihna an neih ṭhat a ngai leh dawn.