Alejandro Garnacho - A mawi chuang e!!!

Football khelmualah goal mawi bik hmuhin a awm tawh ṭhin. Cristiano Ronaldo, Wayne Rooney, Zlatan Ibrahimovic-a te bicycle kick te kha hahipa sawi ṭhin a ni a, chutiang goal mawi huanga tel tlak chu Pathianni zan khan Manchester United rawlthar duhawm Alejandro Garnacho-a'n Everton lakah a khung.

Erik Ten Hag-a hoten Goodison Park-ah mualneitu Toffees chu 3-0 in an hneh a, Garnacho-a'n goal of the season dawng tlak goal a khung bakah Marcus Rashford leh Anthony Martial te nan khung belh. Man United hian November 29, Nilaini zan dar 11:15 hian khualmualah Galatasaray an hmachhawn dawn a, UCL knockout stage khelh an duh chuan chak ngei a ṭul dawn a ni.

A mawi chuang e

Inkhel an ṭan chauh a, Victor Lindelof chuan mual ding lam sira ball lo pawt Rashford tan ball a vawrh chho a, English forward hian Diogo Dalot tlan lut tan a thawlhsak. Dalot chuan vawi khatah a cross nghal a, ball kal chu a laklawh hmel hle.

Mahse, Garnacho-a'n thil ropui thlentir nan a lo hmang a, sang taka zuangin bicyle kick mawi bik hmangin goal kil takah a pet lut - a 'idol' Cristiano Ronaldo goal khung lawm danin a lawm zui a, corner flag bula a 'siuuu' leh a goal mawi chu a inrem hle.

Manchester Derby-a Wayne Rooney-a goal khung dan mithlaah a lang nghal a, chu chiah chu United captain hlui Gary Neville-a sawi pawh a ni. Neville chuan, "Stadium-a mit ngeia ka hmuh tawh chuan overhead kick mawi ber a ni hial ang. Manchester City laka Rooney-a'n goal a khung ṭum pawh khan stadium-ah ka awm," tiin goal mawi zia a sawifiah.

Kum 19 mi Garnacho chuan, "Dik taka sawi chuan ka awih bik lo. Ka goal khung dan kha ka hmu bik lo a, mipui thawm ngaithla pahin 'Oh my God'," tiin a goal khung dasn chu a beisei phak bak a nih thu a sawi.

A hming chu Mainoo

Man United-in goal an khung hma a, Everton-in inkhel an thunun zui. Toffees hian goal chance pawh an nei a, mahse tlarhmaa awm Abdoulaye Doucoure a hriam tawk lo a, Dominic Calvert Lewin a vannei tawk lo bawk.

Everton-in chance ṭha a hlah a, goalline aṭanga ball pet chhuaktu Kobbie Mainoo chuan inkhel entute mit a la hle. Kum 18 mi Mainoo hi pre season-a Man United an chet ṭhat khan player pawimawh a ni a, mah se inhliam vangin hun rei tak a chawl.

November thla tawpah Mainoo a rawn inlan a, midfield-a che tla vel chu hmuhnawm a tling. Match khat lek aṭanga world class a chhiar nghal chu a dik lo a, mahse Toffees laka a chet dan chu Casemiro, Sofyan Amrabat leh Scott McTominay te lak aṭanga United ṭantute beisei ṭhin a ni.

Mainoo hian dam dupin ball a la thla thei a, awlsam hmel takin a pe chhuak thei zel. Mual laiah Mainoo naupanna a lang lo a, Garnacho goal ropui khung zanah a langsar ber zawk. English midfielder hian mual laia ball a chanin a him lama pe let mai loin a hma zawngin ball a pe thei a, hmun awl thei turin hmalam panin a khalh thei bawk.

A goal belh

Tun season-ah Man United an vannei tawk lo ṭhin a, Everton lakah erawh an vannei tawh. Martial chu box chhunga Ashley Young-a'n a tihtluk avangin yellow card pe zet mah se VAR hmanga ennawn hnuah referee-in a card pek hnukkirin penalty a pe zawk. Captain Bruno Fernandes-a'n Rashford a tan a kiang a, kum 26 mi English forward hian tun season-a a goal hnihna a khung ve chauh.

Kum 27 mi Martial pawhin theihna a nei sang mah se French forward hian a theihna a lantir ngai meuh lo. Everton lakah erawh captain Fernandes ball pek luh chu cool taka lain rilru fim takin minute 75-naah a pet lut. Martial hian tun season-ah Premier League-a a goal hmasa ber a khung.

Man United-in 3-0 in hnehna a chang a, point 10 paihsak Everton erawh an chak loh avangin tla thei dinhmunah an ding. Toffees hi point 10 paih hnuah point li hmuin 19-naah an awm mek a, a him china awm Luton Town chu point ngain an pha lo a ni.