MSL khelh chhunzawm an la beisei

Mizoram Super League season 6 chu coronavirus vangin chawlh lailawk mek a ni a, inelna buatsaihtu lam chuan tualchhung basketball inelna sang ber hi season hman zawh theih an la inbeisei.

Tun hnaiah MSL board an ṭhukhawm a, harsatna lian zawk a thleng a nih lem loh chuan MSL6 khelh zawh an duh; chutih rualin sorkar lam ruahmanna an ngaichang a, club thuneitu lam nen inbiakna pawh a la awm chhunzawm a rinawm.

MSL6 hi March thla laihawl thleng khan league round khelh a ni, league match hnuhnung ber chu March 17 khan Khatla TBL leh Ramhlun Basketball Club ten an khel, mahse sorkar thurawn angin relegation playoff leh semifinal chin erawh an khel ta rih lo.

All Star Game chu ṭhulh fel a ni a, league round hnuhnung lam hi a hmuna entu awm loin khelh a ni bawk. League khelh chhunzawm hi thuneitu lamin duh mah se sorkar thutlukna an ngaihchan tel a ngai.

Club paruk inel zingah Zarkawt BCA chuan match nga an khelh tawhah hnehna chang vekin, champion lai hi table hmahruaitu an ni. BCA bakah hian Chanmari Vikings, Khatla TBL leh Tuikual South-te chuan semifinal an lut bawk.

Tualchhung infiamnaah MSL chauh hi chawlh lailawk a ni lo - football lamah veng/khua inelna NECS Cup leh cricket lamah Mahuma Memorial Trophy pawh Covid-19 vangin chawlh lailawk rih a ni.