Terry Venables a thi

England manager hlui Terry Venables chu rei tak a damloh hnuah kum 80 mi niin a thi a, Venables-a chhungte chuan, "Pasal leh pa a nihna tlin em em chuan hahdam takin min kalsan ta," an ti a, an pa chu rei tak a damloh tawh thu an sawi bawk.

Player a nih lai pawha England tana inlan tawh, Barcelona leh Tottenham pawh lo enkawl tawh Venables hian Barcelona a enkawl laiin European Cup final hruai thleng mah se, nomawi a chawi ta lo a, La Liga leh Copa de la Liga-ah a champion pui thung.

Tottenham Hotspur chu kum 1991 khan FA Cup a chawipui a, kum 1997 khan FIFA Confederations Cup-ah Australia chu final a hruai thleng bawk.

Venables hian kum 1994-96 inkar khan England a enkawl a, Euro 96-ah semifinal a hruai thleng. Crystal Palace, Queens Park Rangers, Middlesbrough leh Leeds United a enkawl hman bawk a, Palace leh QPR hi Football League Second Division-ah nomawi a chawipui ve ve.

England captain hlui Gary Lineker chuan, "Coach emaw manager emaw a ni ngawt lo a, ṭhian a ni. A bula awm a nuam a, fiamthu a thiam a, mahse, thil pawh a duh pah hle. Football a hrethiam a, football thluak ṭha tak a nei a ni," a ti - Venables hian Lineker hi Barca leh Spurs coach a nih laiin a la lut ve ve.

Alan Shearer chuan, "Chanchin dengkhawng tak a ni a, mi ropui Terry Venables chu a liam ta. Ka Pu, chawl hahdam ang che - mi ropui tak i ni a, i lakah hian bat ka ngah em em a ni," tiin a coach hlui chu a thlah ve bawk.