Xavi-a'n player siksawi dawn

Barcelona chuan zanin dar 1:30 hian Champions League match pawimawh an khel dawn a, FC Porto an mikhual dawn - an league match hnuhnung bera player khelh dan aṭangin coach Xavi chuan squad a siksawi nual dawn nia sawi a ni.

Catalan club hian Champions League-a an match hnuhnung berah Shakhtar Donetsk chu rin loh takin, 2-1 in an ngam lo a, match li khelh tawhah point kua an nei - Porto nen an point hmuh zat a inang a, pathumna Shakhtar hian point ruk an nei thung.

Ukrainian club hian zanin dar 11:15-ah Royal Antwerp an mikhual dawn a, an chak chuan point kua tho an nei ang. Barca an tlawm chuan Shakhtar nen an point hmuh zat a inang ang a, round of 16 luh lohna chance a sang sawt dawn tihna a ni.

Hei vang hian zaninah Xavi leh a nauten thih thaa an beih a ṭul a, boruak ṭha an mamawh tehlul nen an league match hnuhnung berah Rayo Vallecano chu 1-1 in an inhnehtawkpui a, insiamṭhat an mamawh hle.

Hliam vanga Rayo hmachhawn thei lo goalkeeper Marc-Andre ter Stegen chu lo kir leh tawh tura beisei a ni a, tlarhnungah Alejandro Balde leh Andreas Christensen la chhuakin, Joao Cancelo, Inigo Martinez, Jules Kounde leh Ronald Araujo ten bul an ṭan dawn nia sawi a ni.

Porto lakah Oriol Romeu pawh bench lama hun hmantir a nih a rinawm a, Pedri, Ilkay Gundogan leh Frenkie de Jong te an inkawp a rinawm. Ferran Torres leh rawlthar ṭhangduang Lamine Yamal te pawh hahchawlhtirin, Joao Felix leh Raphinha chu bul ṭan tura beisei an ni a, tlarhma laiah Robert Lewandowski a awm ang.

Xavi-a tana ngaihtuah tel ngai tak erawh kartawpa an inkhel tur a ni a, Barca hian kartawp Pathianni zanah Atletico Madrid chu league match khel turin an mikhual zui dawn a, an fixture a hautak hle.