Spurs-in chak dan an theihnghilh!

Premier League-a an match hmasa 10-ah tlawm an neih miah loh hnuin Tottenham Hotspur-in chak dan an theihnghilh a, a zawna a vawi thum nan league-ah an tlawm - Pathianni zan khan Aston Villa chu 2-1 in an ngam lo. Spurs hian player leh manager a nih anga an club tana FA Cup champion puitu Terry Venables thih thu inkhelh hmain an hria a, amah hriatreng nan minute khat chhung chu kut an beng.

London club hian an manager liam ta thlah nan chak pawh an duh ngei ang - Giovani lo Celso chuan minute 22-naah goal hmahruai a khung a, an duh angin an chak pawh a rinawm hman. Mahse, first half hun pek belhah Pau Torres chuan Aston Villa tan si phurh sutna goal a khung a, Ollie Watkins chuan second half-ah tun season inelna hrang hranga a goal 12-na khung zuiin, 2-1 in an chak daih!

Spurs hian an league match hnuhnung pathum an tlawmnaah hian goal an khung hmasa vek a, Premier League Manager of the Month atana a zawna vawi thum thlan tawh Ange Postecoglou-a'n an tihsual a siamṭhat thuai a ṭul.

League match hmasa 10 khelh hnua table chung ber luahtu Spurs hi match 13 an khelh meuh chuan table-ah pangana an ni a, palina Aston Villa hi point hnihin an phak lo a, season hmang chhia tia sawi hlawh Manchester United aiin point hnih chiahin an sang tawh!