Bellingham-a record nen Real an chak chiang
Real Madrid midfielder ṭha mi Jude Bellingham chuan Spanish club a pan hnua a goal 14-na a khung a, Cadiz lakah Real hi 3-0 in hnehna a chanpui.
Bellingham hian Real tana goal 14 khung turin match 15 bak a mamawh lo a, heti zat Real tana goal khung tura match mamawh tlem ber a ni - English midfielder-in record a siam chhunzawm zel.
Kum 20 mi Bellingham hma hian Cristiano Ronaldo, Alfredo di Stefano leh Pruden te chuan Real tan match 15-ah goal 13 khungin, Real tana an match hmasa 15-a goal khung hnem ber record an chelh.
Mahse, Bellingham a lo lang a, he record hi a rawn khum ta - Real-in table chung ber an luah zui a, nizan inkhelah Girona-in Athletic Bilbao an hneh chuan pahnihnaah an tla thla leh ang.
A hming Rodrygo
Cádiz khelmualah Real tana langsar hmasa chu Rodrygo a ni a, tun hnaia June 2028 thleng Santiago Bernabeu-a cham tura contract ziaktu hian minute 14-na lekah goal hmahruai a khung - Luka Modric siamsak a ni.
Rodrygo hian a duhtawk mai lo. Minute 64-naah amah sawiseltute chhangletin a goal hnihna a khung leh a, beisei anga season hmang loa an sawi forward hian tun season-ah goal sarih a khung leh ta der.
Brazil international hian tun season La Liga-a a match hmasa 12-ah goal khat chiah a khung a, sawiselna a tawk hi a awm lo hran lo. Mahse, kum 22 mi lek a la nih avangin theihna a nei tih a chiang a, Real-in contract thar an pe ta tho.
Spanish club tana rinawmna thu a tiam hnuah a theihna tak tak a pholang a, league match hnih a khelhah goal li ngawt a khung - Cadiz hmaa Valencia an hmachhawn ṭumin goal hnih a lo khung tawh bawk a ni.
Hey Jude
Real-in international break-a a hliam vangin Vinicius Jr chhawr thei lo mah se, Rodrygo-a'n a ṭhianpa awm loh lang lo khawpin a khel a, goal hnih a khung - a tawpa langsar ber erawh Bellingham a ni leh ta tho.
Nipui transfer-a Real Madrid pantu midfielder hian Rodrygo siamsak chu minute 74-naah an goal thumna ni turin a khung a, 3-0 in Real a chakpui - Bellingham hian Real a pan hnuah a vanglai tak tak a chen chho mek.
Spanish club tan league match 12 khelin goal 11 a khung a, Champions League match thumah goal thum a khung bawk. Match 15 a khelh aṭanga a goal khung zat hi goal 14 a ni a, assist vawi thum a nei bawk.
A tawi zawnga sawi chuan match 15 aṭangin goal 17 zetah a inrawlh tawh tihna a ni a, Real hian Borussia Dortmund nen an inrem angin Bellingham-a club hlui pawisa an la pek belh dawn chauh niin a lang.