Vawi 19 chak thei Verstappen

A zawna vawi thum Formula 1 champion ni thei Max Verstappen chuana ropuina a lantir nawn. Tun season atana F1 intlansiak hnuhnung ber Abu Dhabi Grand Prix-ah hnehna a chang a, kuminah vawi 19 tehmeuh hnehna a chang.

Kum 26 mi Verstappen hian car intlansiakna sang berah hian vawi 54 hnehna a chang tling ta a, chak hnem lamah pathumna a ni der tawh. A chungah hian world champion vawi sarih ni thei Lewis Hamilton (103) leh Michael Schumacher (91) te chauh an awm.

Red Bull driver Verstappen chuan, "Season duhawm leh hriatreng tawh tur a ni," a ti. Tun season chhungin lap 1000 zetah hma a hruai tling a, hei mai bakah hian point 575 a hmu, kum khata point hmu hnem record a siam hial.

Mercedes tan erawh kum duhawm lo a ni, kum 2011 hnua a vawi khat nan chak ni hmel hmu miah loin hun an hmang. An driver chhuanvawr Hamilton meuh pawh a kum zawnin a chak ta lo, season thara Red Bull elphak tur chuan hmasawn an ngai nasa hle.

Britain tlangval Hamilton hian world champion nih tam lamah Schumacher nena record inṭawm an neih kal san a tum ṭhin, mahse Red Bull leh Max-a te an awm miau avangin a harsa, kum 38 mi a nih tawh avangin mimala record siam fal chu a harsa tawh ang.