Final-ah Satwik-Chirag te vanduai

India tlangval badminton khel thiam Satwiksairaj Rankireddy leh Chirag Shetty ten China Masters final an thleng a, mahse nomawi inchuhna inkhelah Chinese duo Liang Wei Keng leh Wang Chang te an hneh lo.

Darkar khat leh minute 11 chhung inkhel inhnehtawk takah 19-21, 21-18, 19-21 in a vanduai zawkah an ṭang, game hnuhnung berah hian 1-8 ngawta an hnufual hnuin an bei let a, beisei nei sang leh hman viau mah se a tawpah an ṭang tlang zo ta lo a ni.

Tun ṭumah hian chak lo mah se season duhawm erawh an hmang tho, kumin chhungin Satwik leh Chirag te hian Badminton Asian Championships, Indonesia Super 1000, Korea Super 500 leh Swiss Super 300 nomawi an chawi bakah Asian Games gold medal an la.

Nakkumah Paris Olympic a awm dawn, tunlaia badminton tournament an khelh hi qualifying atan hman a ni hlawm a, infiamna khawmpui lianah hian ranking sang zual 16 an inlan dawn avangin a pawimawh hle a ni.