Inter leh Juventus inhnehtawk

Season duhawm hmangtu Lautaro Martinez-a'n goal a khung zel, tun ṭuma a goal erawh Juventus laka si phurh sutna a ni thung. Pathianni zan Serie A inkhelah Old Lady leh Inter Milan te 1-1 in an inhnehtawk.

Derby d’Italia-ah Juve tan striker Dusan Vlahovic chuan minute 27-naah goal a khung, minute ruk lek hnuah Inter striker Martinez chuan tun season-a atana a league goal 13-na hmangin a sut a, goal dang lut zui loin point an insem.

Inter hian league match 13 aṭanga point 32 hmuin hmahruaitu an ni chhunzawm a, an hnuaiah hian point 30 neitu Juve an awm thung - AC Milan (26 points) pawh an hla lo. Simone Inzaghi naute hian an match lehpekah champion lai Napoli an tlawh dawn, hmabak a hautak leh dawn hle.

Inkhel dangah AS Roma chuan Paulo Dybala leh Stephan El Shaarawy te goal hmangin Udinese 3-1 in an hneh a, a sang zual pali zinga tel phak an tumna an vawng nung zel - season bul ṭan fuh lo viau mah se palina Napoli an phak lohna chu point thum chauh a ni leh tawh.