Ramos-a'n red card a hmu leh ta!

Sergio Ramos chu a career-a a vawi 29-nan hnawhchhuah a ni a, Sevilla chu Real Sociedad lakah 2-1 in a tlawmpui - Ramos hi minute 88-naa Brais Mendez laka hlauhawm taka a chet avangin hnawhchhuah a ni a, hetihlai hian 2-1 a ni tawh sa.

Kum 37 mi Ramos hian La Liga bikah red card a vawi 21 hmuhna a ni a, La Liga record a ni - Real Madrid captain hlui hian khelmual chhunga a mize rorum lutuk a kalsan hleithei lo a ni ber.

Ramos hi kum zabi 21-naa red card hmu hnem ber a ni a, Rafael Marquez (21) leh Felipe Melo (20) chu amah hnaihtu an ni - minute 82-naah yellow card pek a ni a, a hnu minute ruknaah a yellow card pahnihna hmuin hnawhchhuah a ni ta a ni.

Real Sociedad khelmuala inkhelah hian Sevilla winger Jesus Navas pawh Ramos chhan a ti na deuh hlek a, hnawhchhuah a ni - Navas tan La Liga game-a a red card hmasa ber a ni thung a, senior player pahnih tel loin Sevilla-in hnu an khar.

Sociedad hian minute thumna lekah Sevilla goalkeeper Marko Dmitrovic-a own goal hmangin hma an hruai a, Umar Sadiq chuan yard 25 vela hla aṭangin minute 22-naah a belhchhah bawk.

Sevilla tan Youssef En-Nesyri chuan minute 60-naah si phurh a sut ṭhen a, mahse, goal dang an khung lawk theih loh avangin 2-1 in an tlawm.