Bayern-in risk an la dawn em?

Bayern Munich-in zanin dar 1:30 hian Copenhagen an mikhual dawn. Thomas Tuchel hote hian tun season UCL match li an khelh tawh aṭanga an la chak vek avangin last 16 an lut tawh a, Danish club an hmachhawn hunah hian indah ṭha thei dinhmunah an ding.

Chutihrualin UCL-a hnehna chan hi a sum ang zawnga teh pawha itawm tham a ni ve a, match khat chak hian euro maktaduai 1.2 an dawng. Bayern hi vawi li an chak tawh avangin euro 11.2 an dawng tawh a, khelh hmabak an chak leh ve ve chuan euro maktaduai 16.8 an dawng thei ang.

Tuchel-a hote hi chak vek mah se inchhuang thei an ni lo a, awlsam taka chak an nei meuh lo. Hemi a nih avang hian Copenhagen laka player pawimawh hahdam tir hi a ngamawm loh theih bawk. German champion hian kartawp khan Cologne 1-0 in an hneh a, goal awmchhun hi Harry Kane a khung a ni.

Kum 30 mi Kane hian Bundesliga-ah goal 18 khung tawhin top scorer a ni mek a, a hnuaiah Stuttgart forward Serhou Guirassy (goal 15) a awm. Goal khung tam berin an dawn ṭhin 'Kicker-Torjagerkanone' chu Kane hian a dawn ngei a rinawm a, he chawimawina hi Robert Lewandowski khan vawi sarih zet a dawng.

Champions League-ah Kane hian goal li a khung tawh a, Man United striker Rasmus Hojlund leh Atletico Madrid forward Alvaro Morata te chu goal khatin a la tluk lo. England captain Kane hi a club khelhnain a zir loh ṭhin avangin UCL-ah top scorer a la ni lo a, kumin hi a tan hun ṭha a ni tih hriatin goal khung tam ber nih ngei a duh ang.