Istanbul-ah Manchester United dinhmun a chiang dawn

UEFA Champions League-ah Manchester United-in an group-a awm Bayern Munich, Copenhagen leh Galatasaray te vawi khat ṭheuh an hneh lo tawh a, heti chung hian an la tla bik lo. Zanin dar 11:15 hian Erik Ten Hag-a hoten Rams Park, Istanbul-ah Galatasaray an tlawh dawn a, beisei nei turin English club tan chak ngei a ṭul dawn.

Man United hmabak a harsa a, harsatna belhchhah turin Marcus Rashford chu hrem vangin a inlan thei dawn lo. Lisandro Martinez, Casemiro, Christian Eriksen, Mason Mount, Jonny Evans leh Tyrell Malacia te inhliam vangin an tel thei lo chiang a; Champions League-a goal nga khung tawh Rasmus Hojlund dinhmun a chiang lo bawk. Ten Hag-a hote hi UCL last 16 chu sawi loh Europa League playoff round pawh khel pha lo thei dinhmunah an ding.

Bul ṭan ṭha lo rah

Man United hi Bayern Munich nen group khata an awm khan hmabak a harsa dawn tih a chiang nghal a, an vanduaina chu Allianz Arena-ah match hmasa ber khelin team ṭha ber Bavarians an hmachhawn nghal. Ten Hag-a hoten Allianz Arena-ah goal thum khung thei mah se goal li an chhuah a, point an hmu lo.

Old Trafford-ah zanina an khingpui tur Galatasaray an mikhual a, inkhel pawimawhah keeper Andre Onana a chesual. Man United tana rawlthar duhawm Hojlund goal hnih khungin rah ṭha a thlen lo a, an mualah 3-2 in an tlawm. Ten Hag-a hoten match hmasa pahnihah point an hmu lo.

Parken Stadium-ah match thumna an khel a, Man United-in harhtharna an chang. Season hmasa lam aṭanga sawisel hlawh tawh Harry Maguire-a'n goal awmchhun a khung a, Old Trafford-a mualpho Onana-a'n hun tawp dawnah penalty dangin 'hero' a ni leh ta thung.

Mahse, Man United hian khualmuala an hneh theih Copenhagen hi an mualah an inlehthaltir. Old Trafford-a an inkhelh ṭumin Hojlund-a'n first half-ah goal hnih a khung a, inkhel an thunun bawk. Ten Hag-a hoten kawng dik an zawh chhoa a lan laiin Rashford chu hnawhchhuah a ni a, player 10-a khel Man United hi 4-3 in an chak lo. Rashford hian hrem vangin Galatasaray pawh a hmachhawn thei lo ang.

Beiseina thar chu

Man United-in Copenhagen hneh loh zawhah Luton Town chu an mualah 1-0 in an hneh hram a, point thum hlu tak hlawh chhuak mah se an khelh danah an la insiamṭha lo. Ten Hag-a hote vanneihna erawh international break a awm a, hahdamna leh insiamṭhatna hun an nei a, player inhliam nei tan inenkawlna hun a awm bawk.

International break a zo chiah a, Goodison Park-ah Everton hmachhawn turin Man United an lenglut. Season liam taa tlarhnunga player pawimawh ber ang hiala chhal theih Luke Shaw a dam tawh a, bul a rawn ṭan nghal. Pre season-a che ṭha Kobbie Mainoo pawhin bul a rawn ṭan a, tun season ang zawnga thlir chuan mi thar pahnih hmuh tur an awm.

Bul ṭantu zingah keeper Onana chiah chu Ten Hag-a sengluh a tih theih a, a dang zawng chu Dutch manager awm hmaa Old Trafford-a awm tawh an ni hlawm. Inkhelh ṭan aṭanga rei loteah rawlthar duhawm bik Alejandro Garnacho-a'n goal ropui a khung a, second half-ah Rashford leh Anthony Martial ten an khung belh. Man United-in goal thum an khung a ni ringawt lo a, goal an chhuah lo. Ten Hag-a hote hian player inhliam ngah mah se Toffees laka an result avangin beisena thar an nei a, Dutch manager ban duhtu thawm pawh a reh rih bawk.

United hmel hmang

Ten Hag-a'n Everton laka hnehna changtute chungah rinna a nghah nawn a rinawm a, Hojlund hi dam hman pawh ni se bench aṭanga a rawn luh a rinawm zawk. Martial-a'n Toffees lakah tawih zetin goal a khung a, he goal vang hian French forward hian bul ṭan a phu ve bawk.

Rashford erawh hrem vangin a khel thei lo a, player man to Jadon Sancho leh Antony te chhawr theih an nih bawk loh chuan Garnacho awm lohna lama awm turin Facundo Pellistri chhawr a ṭul ang. Midfield-ah pawh tawnhriat ngah zawkte an inhliam avangin Mainoo tan hun ṭha a inhawn a rinawm a, Toffees lakah a khelh dan thlirin bench-a dah phal chi a ni lo bawk.

Tlarhnung pawh an siksawi a rinawm lo a, chutihrualin Copenhagen an hneh loh ṭuma mawhphurhtu Diogo Dalot an awltir pawhin a mak lo ang. Dalot aiah defending ṭha zawk Aaron Wan-Bissaka a awm thei dawn. Eng pawh chu ni se United tana bul ṭan turte hi season ṭan hmaa club ṭantute mitthla dan chu a ni lo tawp ang. Thla 3-4 chhung leka thil danglam theihzia sawifiahtu a ni.

Galatasaray chu

Super Lig-ah Galatasaray hi pahnihnaah an awm mek a, pakhatna Fenerbahce nen an point hmuh zat a inang chiah. Tun hma aṭangin Galatasaray khelmuala inkhelh hi ṭantu an neih ṭhat avangin a harsa ṭhin a, Man United tan pawh a awlsam dawn lo.

Kartawp khan Galatasaray hian Alanyaspor chu 4-0 ngawtin an mualah an sawp a, Ten Hag-a hote mikhual turin an inpeih hle. Group A hmahruaitu Bayern Munich-in Turkish club hi an mualah 3-1 in an hneh thei a, mahse goal aṭanga teh chi an ni lo. Bavarians leh Galatasaray te hi an inkhel tawk a, Thomas Tuchel-a hote hi hun tawp lamah phei chuan an nawr bet hle.

Alanyaspor an hneh ṭum hian player langsar Mauro Icardi, Dries Mertens (goal hnih) leh Wilfried Zaha ten goal an khung vek a, heng player-te hi Man United te pawhin an ven uluk turte an ni.