MPL10-ah semifinal khelh phak a har dawn

Zote Toyota MPL10-ah round 10 khelh zawh a ni tawh a, match li khelh tur a la awm. Team dinhmun thirin kum dang zawng aiin semifinal khelh phak a harsa dawn a, match thum chhung Aizawl FC an awl dawn bawk avangin knockout khel tur pawh hi a hriat lawk lo ang.

MPL10-ah hian a sang pangaa awm Mizoram Police, Chanmari FC, Chawnpui FC, Chhinga Veng FC leh Aizawl FC ten semifinal khelh beiseina sang tak an nei vek. Point hmu tam pahnih Police leh Chanmari ten point 19 an hmu tawh a, panganaa awm Aizawl FC-in point 15 an hmu. Match hnih lekah a chung bera awm hi panganaah an awm thei a, hei hian semifinal inum boruak sanzia a pholang.

Aizawl FC hi I League khela an zinchhuah avangin an awl rih dawn a, hemi avang hian tunkara Mizoram Police nena an inkhel tur chu sawn hlat a ni. Team pahnih hi December 18, Thawhṭannia inkhel tura ruahman a ni a, an inkhel result hian semifinal lut tur a hril thei hial ang.

Tunah erawh round 11 thlir hmasak phawt a ṭul a; December 1, Zirtawpnia khelh tur Chawnpui FC leh Chanmari FC inkhel tur hi quarterfinal ang hiala chhal theih a ni. Lalsangzuala Hmar enkawl Chhinga Vengin phase 2-ah hnehna an la chang vek a, December 2, Inrinniah FC Venghnuai an hmachhawn leh ang.