Arsenal an tling dawn?
Zanin dar 1:30 hian Arsenal chuan Champions League group match khel turin Lens an lo mikhual dawn. Mikel Arteta naute hian Ligue 1 club lakah point khat chauh an hlawh chhuak a nih pawhin last 16 an lut chiang tawh ang.
Arsene Wenger hoa UCL khel ṭhin kha hun rei tak chhung an awl vang vang a, manger Mikel Arteta hoin European football inelna sang berah hian team thar ang maiin an inlan, an phur em avangin zaninah pawh Emirates Stadium a khat ṭha leh dawn.
An inkhelhna tur hi North London a ni a, mualneitu an nih avangin Gunners hi rinkai an ni ang. Mahse, hei erawh hriat tel a ngai - France rama an zinchhuah ṭum pawh khan rinkai ni mah se an chak lo, chesual thei an ni tih hriat a fuh ang.
Anmahni khelmual bikah chuan Arsenal hian European match an khelh hnuhnung vawi 12 aṭangin vawi kua hnehna an chang a, vawi khat chiah an tlawm. Lens tan pawh lenluh a châkawm lo ve ang, last 16 beiseina an la neih avang erawh chuan thapui nen an bei dawn.
Kar tawp Premier League an khelh ṭumin Gunners hian Brentford chu 1-0 in an hneh, he inkhelah hian goalkeeper David Raya chuan a club nghet a hmachhawn lo, zaninah erawh si ban a rawn nghak chhunzawm leh tura ngaih a ni.
Aaron Ramsdale a khel chhe lo a, goal a chhuah lo - chutihrualin Declan Rice vangin a mualpho tur hliahkhuh hram a ni a, chuvangin coach Arteta tan Raya aia thlan chhunzawm a harsain a rinawm.
Oleksandr Zinchenko, Gabriel Magalhaes leh William Saliba te inkhel turin an inpeih vek a, anni bakah hian Ben White a dam tawh; tun hnaiah Takehiro Tomiyasu chu a rintlak bawk a, tlarhnung lamah buaina a awm lo ang.
Khawthlang chanchinbute chuan Martin Odegaard leh Gabriel Jesus te pawh mamawh hunah chuan an chhawr theih tawh niin an ziak. Anni pahnih hi an inkhel a nih pawhin minute tam an khelh erawh a la rinawm loh a, an dam chho ta erawh Gunners tan chanchin lawmawm a ni.
Group B inkhel dangah Sevilla chuan PSV Eindhoven an lo mikhual dawn. Spanish club hi Europa League lamah che ṭha ṭhin viau mah se kumin UCL-ah chak ni hmel an la hmu viau miah lo, mualpho hliah khuh nan chak an mamawh hle.
PSV hi Dutch league hmahruaitu an ni a, zanina an chak bakah Arsenal an lo chak bawk chuan an tlang thei dawn - Peter Bosz enkawl team hian khualmual aṭanga point thum hmuh an tum ruh khawp ang.