Real Madrid mualah Napoli

Zanin dar 1:30 hian Real Madrid chuan Champions League group match khel turin Napoli an lo mikhual dawn. Spanish club ṭha hian point khat lek pawh an hmuh belh a nih chuan group C hmahruaitu an ni chiang tawh dawn.

Group match vawi li an khelh tawhah Real Madrid hi an la chak vek a, point 12 hmuin a chung berah an awm. Pahnihna Napoli hian point sarih hmuin last 16 lut turin an dinhmun a ṭha thawkhat a, chutihrualin an la tlang chian loh avangin point an mamawh.

Carlo Ancelotti-a'n a club hlui a hmachhawn dawn a ni a, an sulhnu en mai chuan Real Madrid hi chak zawk tura rinkai an ni. Serie A club an hmachhawn hnuhnung pakuaah an chak vek, heng zingah hian Maradona Stadium an luhchhuah pawh a tel.

Group C inkhel dangah Braga chuan point khat chauh la nei Union Berlin an mikhual dawn. Portuguese club Braga hian point thum an hlawh chhuak lo a nih chuan, an chunga awm Napoli chu chak lo pawh ni se Italian club hi an tlang chiang dawn tho a ni.

Real Madrid hi...

Kar tawp La Liga inkhelah Real Madrid hian Cadiz chu 3-0 in an hneh a, he inkhelah hian forward ṭha Rodrygo-a'n goal hnih a khung bakah season duhawm hmangtu Jude Bellingham chuan goal khat dang a khung bawk.

Los Blancos manager Ancelotti-a'n a player pahnih hi hahchawlhna hun pek a duh mai thei, chutihrualin khelh hmabak pakhat nei chunga hmahruaitu nihna nemngheh a duh a rinawm, chuvangin a player ṭha khek vak ngawt a rem lo thei tho.

An intawn hmasakin Bellingham-a'n goal a khung a, "Stadium chhung boruak pui takah team ṭha kan tum a, goal ka khung tawh hoah chuan a ṭha berte zinga mi a ni hial ang," tiin a ngaihhlut thu a sawi, hmachhawn nawn leh a châk ang.

Malpui hliam vangin Vinicius Junior a chawl a, tlarhma lamah tawnhriat ngah Joselu kan hmuh leh a rinawm. Cadiz laka hliam tuar Luka Modric dinhmun a chiang lo, Croatian midfielder bakah hian Aurelien Tchouameni leh Eduardo Camavinga te an chawl mek bawk.

Toni Kroos leh Federico Valverde te mawhphurna a sang leh dawn, anni pahnih thlawp tur hian Brahim Diaz chu bul ṭan tura rin a ni a, an chesual viau a nih ngawt loh chuan hliam ngah deuh mah se Real hi an la ṭha tawk hle.

Defender ṭha David Alaba pawh mamawh chuan chhawr theih turin a inpeih tawh. Austrian denfender hi Cadiz lakah khan la inkhel chiah lo mah se bench lamah hun a hmang thei tawh, hei hi manager Ancelotti tana chanchin lawmawm a ni ang.

Napoli hi...

Mak tak maiin season hmasa hman Napoli hian Serie A nomawi an chawi a, khawvel an brakhaih. Diego Maradona hoa an champion hnua an champion lehna hmasa ber a ni a - Naples khawpui chu football vangin an hlim a nih kha.

Mahse, coach Luciano Spalletti a chhuak thut a, nikum lama an boruak ṭha leh hmuhnawm ang kha chu an la nei phak leh chiah lo. Chutihrualin, an match hnuhnung berah Atalanta 2-1 in an hneh thei, an phur lai tak a ni ang.

Real Madrid an hmachhawn hmasak khan Rudi Garcia hoin an khel a, mahse tunah chuan Garcia hi banin Walter Mazzarri hoin an khel tawh, an boruak a danglam hretin a rinawm - Real Madrid hneh tur erawh chuan thapui thawh a ngai dawn.

October 13 hnua a vawi khat nan Victor Osimhen chu Atalanta lakah a inlan leh thei tawh. Nigeria international striker hi Real Madrid laka inkhel bul ṭan turin a dam tawh, season hmasa Serie A champion puitu hi Real tlarhnung tana ven ngun ngai a ni ang.

Napoli hian left-back laman buaina an nei, an match hnuhnung berah Mathias Olivera chu zawn chhuah a ni a, a hmain Mario Rui chu hliam vangin a lo chawl tawh bawk - Juan Jesus an pawh mai a rinawn. A sirah Jesus a awm a nih chuan a laiah Amir Rrahmani leh Natan te an inkawp thungin a rinawm.

Manager thar hnuai phur thar an ni a, tun hma lama an tih hleihtheih loh ni mah se Santiago Bernabeu Stadium luhchhuah ngei an tum dawn, hnehna an chang a nih phei chuan Real hmahruaitu an la chuhbuai phak dawn a ni.