Marquez thlaktu Marini

Marc Marquez-a'n Repsol Honda a chhuahsan a, a hmun ruak luah turin Japanese team chuan Luca Marini an lalut - Marini hian season thar aṭang chuan Honda bike khalh chungin MotoGP a hmachhawn thei tawh dawn a ni.

Marini-a hi Valentino Rossi unaupa a ni, an nu thuhmun mah se an pa te erawh a hran. Rossi hian bike intlansiakna sang berah world title pasarih a la, chung zinga pathum chu Honda team tan a ni a, tunah a unaupa in a sulhnu a chhui dawn.

MotoGP world champion vawi ruk ni tawh Marquez-a hian a unaupa Alex zuiin Ducati satellite team Gresini Racing a zawm fel tawh a, a team hmasa Honda nena an contract neih lai la zo lo mah se inhriatthiam tawnna in an titawp.

Honda chuan thuchhuah siamin, "Honda Racing Corporation chuan 2024 leh 2025 MotoGP World Championship season atan Luca Marini kan lalut tih kan puang," an ti a, beiseina thar an neih thu an tarlang bawk.

Kum 26 mi Marini hian kum 2021 aṭang khan VR46 Ducati team tan a tlan a, inelna hniam zawk Moto2 championship lamah chuan kum 2020 khan pahnihna dinhmun a lo luah tawh a ni.

Bike intlansiakna sang ber season tharah chuan Spanish rider Joan Mir nen Repsol Honda team tan an tlan ang - kum 2020 khan Mir-a hian Suzuki bike khalh chungin MotoGP-ah hian hlawhtlinna a lo chang tawh.