UCL - Tlin leh tlak theih dan

UEFA Champions League-ah hian team 32 an awm a, group pariatah ṭhendarh niin group tina a sang pahnihna ṭheuhin last 16 an lut dawn. Nizan inkhel result kan hre hman lo a, he thu ziah lai hian Bayern Munich, Inter Milan, RB Leipzig, Manchester City, Real Madrid leh Real Sociedad ten knockout stage an lut tawh.

Zanina khel tur group A-D dinhmun chu a hnuaia tarlan ang hi a ni.

Group A : Bayern Munich an tling tawh. Club dang pathum Copenhagen, Galatasaray leh Man United tan beisei tur a la awm vek. Zanin inkhelh zawhah eng result pawh thleng se Copenhagen ten Last 16 an la luh theih loh ang bawkin an la tla thei lo.

Man United erawh Galatasary an hneh lo a nih chuan last 16 an lut thei dawn tawh lo a, Turkish club an hneh loh bakah Copenhagen-in Bayern an hneh a nih chuan palinaah an awm chiang ang. Pathumna hian Europa League playoff round a la khel thei a, palina chu a tla hlawm hlak.

Group B : Arsenal hian Lens lakah point an hmuh hrim hrim chuan last 16 an lut dawn a, chak lo pawh ni se PSV-in Sevilla an hneh loh chuan knockout stage an lut tho dawn. Gunners hian hnehna an chan chuan group hmahruaitu an ni dawn a, an inhnehtawk a nih chuan group hmahruaitu ni tur chuan PSV leh Sevilla an inhnehtawk a ngai.

PSV-in Sevilla an hneh a, Arsenal an chak bawk chuan Dutch club hian last 16 an lut dawn. Lens hian Arsenal an hneh lo a, PSV-in Sevilla a hneh lo a nih chuan last 16 an lu thei dawn lo.

Sevilla-in PSV an hneh lo a nih chuan an tla dawn a, an inhnehtawk a nih pawhin Lens-in Arsenal an hneh chuan an tla tho ang.

Group C : Real Madrid-in last 16 an lut tawh a, Napoli laka point an hlawh chhuah chuan a sang pali zingah an tel ang. Italian club pawhin Real Madrid hi an hneh thei a nih chuan last 16 an lut dawn. Inhnehtawk chunga knockout stage lut tur chuan Braga leh Union Berlin an inhnehtawk emaw Braga an chak loh emaw a ngai ang.

Napoli an chak chuan Braga beiseina a tawp ve nghal a, Real puihna hmanga beiseina nei tur chuan Portuguese club tan chak ngei ngei a ṭul. Union Berlin tan last 16 beiseina a tawp tawh a, pathumna nichunga Europa League playoff khel turin Braga hneh ngei a ngai ang.

Group D : Real Sociedad leh Inter Milan ten last 16 an lut tawh. Salzburg leh Benfica ten Europa League playoff khelh beiseina an la nei ve ve a, team pahnih hi group match tawp berah an la inkhel dawn.