VAR lansarh zana Wolves hnehtu Fulham

Thawhṭanni zan khan Premier League-ah inkhel pakhat a awm a, club intawngte langsar lo mah se, inkhel boruak avangin inkhelin sawi zui a hlawh a, football hmuhnawm bik entirin kan awm.

Fulham chuan an mikhual Wolverhampton Wanderers chu 3-2 in an hneh a, an chakna goal hi injury time-a Willian-a'n penalty aṭanga a khung a ni - Wolves tan a uiawm takzet a, video assistant referee lakah an lungawi lo tel ang.

Cottagers (Fulham sawina) tan Willian chuan goal hnih a khung a, a goal khung hi penalty aṭanga lut ve ve a ni - Alex Iwobi chuan Fulham tan hian goal hmahruai a khung bawk.

Wolves tan Matheus Cunha leh Hwang Hee-chan ten goal khat ve ve an khung a, South Korean forward Hee-chan goal khung pawh hi penalty aṭang thoin a ni - inkhel a hmuhnawm takzet.

A goal hma

Craven Cottage-a inkhelah goal hmu turin nghah rei a ngai lo. Mualneitu Fulham tan Iwobi chuan minute sarihna lekah goal hmahruai a khung a, Wolves goalkeeper Jose Sa dan hman lohin hnai set sawt aṭangin a khung.

Mahse, Wolves an hnufual rei lo - minute 22-naah Matheus Cunha a inlar a, Atletico Madrid forward hlui hian Jean-Ricner Bellegarde siamsak chu si phurh sutna goal ni turin a tauh lut.

Goal dang lut loin chawlhlawk hman a ni a, second half-ah goal thum kan hmu thung - penalty vek a ni! Minute 59-naah Wolves defender Nelson Semedo chu Tom Cairney lakah a chesual a, penalty a chawi.

Willian chuan penalty hi harsatna nei loin goal-ah a chantir a, a la tawp mai lo. Minute 75-naah Hwang chuan penalty aṭang bawkin si phurh a sut a, point an insem mai dawna a lan hnuah Fulham-in penalty hmu lehin, Willian bawkin goal-ah a chantir.

Hmelma VAR

Fulham khelmualah referee Michael Salisbury-a'n penalty spot vawi thum a kawk a, a hmasa berah sawisel theih a awm nghal - Semedo-a'n Cairney a titlu niin a lang a, referee hian penalty a ham. Rei tak VAR a rawn leh a, a thutlukna a sawh sawn lo.

Mahse, Semedo hian Cairney tluk hma hian ball a tawk fuh a, referee thutlukna hi sawisel theih a ni. Minute 75-naah penalty dang kan hmu leh a, hemi ṭum erawh Wolves lam chan a ni thung.

Inkhel ṭantir lama bar pet pertu Hwang Hee-chan chu penalty area-ah tihtluk a ni a, VAR rawn a nih hnuah penalty pek a ni. South Korean forward hian goal-ah a chantir a, 2-2 a ni.

Hun pek belh minute lina a ni a, 'drama' dang a la thleng cheu. Wolves midfielder João Gomes chuan Harry Wilson a titlu a, penalty a chawi - referee-in a tirah ham lo mah se VAR a rawn hnuah a thutlukna a thlak a, penalty spot bawk kawkin Willian chuan goal-ah a chantir.

Van a duai

Wolves-in point hlawh tura an inngaih laiin, VAR vangin a tlawm zawkah an ṭang a, tun season-a an tana VAR nunrawnna hi an tan chuan, "Van a duai," tia sakpui loh chi rual ni pawhin a lang lo!

Manchester United nen an inkhelh ṭumin United goalkeeper Andre Onana chu Sasa Kalajdzic lakah foul mah se, penalty pek an ni lo a, he thutlukna dik lo avang hian Professional Game Match Officials Limited (PGMOL) hotupa Howard Webb chuan Wolves thuneitute be pawpin, ngaihdam a dil.

November thlatira 2-1 a Sheffield United an ngam loh ṭum khan hun tawp dawnah penalty an chawi tawh a, manager Gary O'Neil chuan, "Thutlukna dik lo hul hual," tiin a sawisel. International break hmaa Newcastle United nen 2-2 a an inhnehtawk khan, Hwang chuan penalty a chawi a, hei pawh hi Webb chuan a hnuah thutlukna dik lo a nih thu a sawi!

Thawhṭanni zanah VAR kaltlangin penalty vawi hnih an chawi leh ta a, tun season zet chu VAR-in an tan vanneihna a keng lo a ni ber - Fulham erawh league match li zet a zawna an tlawm hnuin hnehna an chang ve leh ta.