Maharashtra Open champion Jiri Vesely

India rama tennis inelna ngaihhlut Maharashtra Open chu Pathianni zan khan khelh zawh niin Jiri Vesely a champion. Nomawi inchuhna inkhelah Vesely hian Egor Gerasimov chu darkar hnih leh minute 12 chhungin 7-6 (2), 5-7, 6-3 in a hneh.

Czech Republic tlangval hi hliam vangin hun rei tak a buai a, harsatna hrang hrang vangin season nga vel chu a hmang mumal lo. Tun inelnaah harsatna nei loin a inkhel thei, quarterfinal leh semifinal lamah match point vawi ruk ngawt inchhanhim chungin final a lut.

Final-ah player pahnih an inkhel tawk hle, service nei ṭha Vesely-a'n vawi 26 ngawt aces vaw chhuakin hlawhtlinna a chang - ATP 250 title a lak vawi hnihna a ni chiah bawk.

Doubles lamah Swedish-Indonesian pair Andre Goransson leh Christopher Rungkat te ṭangdun chuan Israeli-Belarusian pair Jonathan Erlich leh Andrei Andrei Vasilevski te chu 6-2, 3-6, 10-8 a hnehin ATP tour men's doubles title hmasa ber an la.