Isak-a'n goal mawi a khung

AFC Cup-ah Odisha FC chuan 5-2 in Mohun Bagan an hneh a, Isak Vanlalruatfela chuan Odisha tan goal mawi bik a khung - a goal khung hi Odisha goal hnuhnung ber leh hun pek belha lut a ni.

Thawhṭanni zana team pahnih intawn hmain, Odisha hian knockout round lut turin chak an mamawh tih an hria a, heti chung hian Kolkata club tan Hugo Boumous chuan goal hmahruai a lo khung.

Mahse, Bagan fans phur mah se an phur sual a, an goal khung hi Odisha chhaih kawlhna mai a ni - Fiji captain Roy Krishna, Brazilian striker Diego Maurício leh Japanese winger Cy Goddard hmangin Odisha hian an chhanglet a, 3-1 a ni der.

Bagan beiseina siam turin Kiyan Nassiri chuan khung ve leh zuk mah se awmzia a nei lo. Hun pek belhah Odisha tan Aniket Jadhav leh Isak-a ten goal khat ve ve an khung leh a, 5-2 in an chak.

Isak-a hian ṭha taka ball a um luh hnuah Bagan keeper Vishal Kaith lo tlan chhuak chu hmuin, a pet khum a, an club goal ngana khungin, 5-2 in a team hi hnehna a chanpui ta a ni.

Odisha tan hian defender Jerry Lalrinzuala, midfielder K. Lalṭhathanga leh forward Jerry Mawihmingthanga ten inkhel bul an ṭan a, bench aṭanga luhtir Isak-a'n goal khungin a tawp a khar thung.

Aizawl FC forward hlui Isak-a hian AFC Cup-ah goal hnih a khung ta der a, ISL lamah coach Sergio Lobera rin a hlawh bawk - a hmabak a êng hle.

Odisha-in Bagan an hneh avangin Kolkata club tan knockout round beiseina a tawp a, an awmna group D aṭang hian hmahruaitu chiah knockout round luh tur a ni. Bangladesh club ṭha Bashundhara Kings leh Odisha ten an beisei mek.

Team pahnih hi December 11 zanah an intawng dawn a, Odisha aia point khata sang zawk Bashundhara tan draw result a tawk laiin, Odisha tan chak a ngai dawn thung - Indian club vanneihna erawh mahni muala an khel tur chu a ni.