MZU examination ṭan UG exam sawn rih thung

Mizoram University (MZU) chuan nimin khan an ruahman lâwk angin exam an buatsaih ṭan a, nimin bikah zirlai 828-in exam an hmachhawn. Vawiina exam ṭan tura tih tho, under graduate exam erawh chu tiam chin awm loa sawn rih a ni thung.

MZU thuneitute aṭang­a thu dawn danin, nimin khan MZU cam­pus-a awm post graduate (master degree)-a depart­ment 25-a zirlaite'n exam an hmachhawn a, anni bakah hian B.Tech leh B.Arch zirlaite, Pachhunga University College-a master degree zirlaite'n exam hmachhawnin, an vaiin zirlai 701 an ni.

Professional course - Master of Computer Application (MCA) zirlai mi 33 leh Bachelor of Computer Application (BCA) zirlai 94-te'n exam an nei bawk a; anni nen hian nimina exam nei zawng zawng chu mi 828 an ni.

Ruahman lâwk angin MZU exam hi kalpui zel tum a ni a; chutih laiin, under graduate leh professional course dangte'n exam an la ṭan thei lo thung.