Aizawl FC-in point an hlawh chhuak

I League-ah Aizawl FC-in Thawhlehni zan khan Rajasthan FC an hmachhawn a, Deccan Arena-ah ṭum hnih zet hnufual mah se Lalrinzuala hmangin si phurh an sut ve ve. Mizo club hian khualmualah point khat hlu tak an hlawh chhuak a, goal hnih khungtu Serchhip tlangval Rinzuala chu man of the match-a thlan a ni.

Aizawl FC hian khualmualah match thum dang an la khel dawn a, December 2, Inrinni hian Real Kashmir an hmachhawn dawn. Kashmir an tlawh zawhah Trau nen December 7, Ningani hian Kolkata-ah an inkhel ang a, Shillong Lajong nen December 10, Pathianni hian Shillong-ah an inkhel leh ang.

Mizo an ṭhahnem

Aizawl FC-in defence laiah Lalmuanawma (Munez) leh Serbian defender Ivan Maric te an inkawptir a, Goan goalkeeper Nora Fernandes leh midfielder Sheikh Sahil te bul an ṭantir bawk. Maric, Fernandes leh Sahil te chauh hi hnamdang an ni a, coach B. Malsawmzuala'n bul ṭantu zingah Mizo player pariat a thlang.

Rajasthan FC pawhin Labiakzuala bakah Sairuatkima leh Lalchungnunga Chhangte te bul ṭantu zingah an rawn tel a, bench aṭangin Vanlalzahawma a inlan bawk. Aizawl FC-in bench aṭanga Mizo player pali dang an luhtir nen phei chuan Mizo 16 zet Deccan Arena-ah an inlan tihna a ni.

Rajasthan hian home match khelh nan Sreenidi Deccan khelmual an ṭawm a, Hyderabad-a Mizo awm ṭhahnem takin Aizawl FC an ṭawiawm bawk.

Rinzuala Show

Aizawl FC-in Rajasthan lakah point thum inbeisei mah se khualmuala inkhelh a harsa ṭhin. Mualneituin Rajasthan-in Lunkim Seigoulun Khongsai hmangin an khung hmasa a, a siamsaktu hi Mizo tlangval Btea a ni.

Mizo club an insiamṭha rang a, tun hnai a che ṭha tak Rinzuala hmangin Aizawl FC-in minute thum hnuah si phurh an sut. Mahse, Richardson Kwaku Denzell hmangin minute 31-naah Rajasthan-in hma an hruai lehnghal.

Aizawl FC-in si phurh sut ngei tumin second half ṭantirhah KC Larchhuakmawia an luhtir a, Lalbiakdika pawh darkar khat hnuah a inlan ve leh bawk. Minute 68-naah AFC-in Rinzuala hmangin si phurh an sut a, RG Stadium-a freekick ropui khungtu R. Lalthanmawia siamsak a ni.

Goal dang khung theihna hun la awm bawk mah se foreign player ngah zawk Rajasthan laka point hlawhchhuah hi Aizawl FC tan a hlu a, Mizo club-in second half-ah an goal humhimin point khat an hlawh chhuak.

Serchhip tlangval Rinzuala hi tun hnaiah a che ṭha hle. I League-a Neroca 3-1 a an hneh ṭumin hattrick a siam a, an muala Namdhari 3-0 a an hneh ṭumin goal hmahruai khungin man of the match-a thlan a ni. Rajasthan an hmachhawn hma hian MPL-ah team ṭha Chanmari FC an hmachhawn a, Rinzuala hian goal hmahruai khungin man of the match-a thlan a ni bawk. MPL10-a goal riat khungtu Rinzuala hian I League-ah goal ruk a khung a, Gokulam Kerala striker Alejandro Sanchez Lopez (goal 9) chiah a aia khung tam a awm a ni.