MBBA Cup champion Khatla TBL

Mizoram Basketball Association buatsaih MBBA Cup-ah Khatla TBL an champion a, final-ah Zarkawt BCA chu 87-78 in an hneh. Zarkawt BCA-in hun rei tak chhung tualchhung basketball inelna thunun mah se tunah chuan roreltu thar an awm a, tunhmaa rorelna ṭhuthleng luahlum ṭhintu Khatla TBL an rawn lang leh ta.

Khatla TBL hian MSL8 final-ah Zarkawt BCA hi an hneh a, July thla khan MBBA Season Opening final-ah hneh lehin tun ṭumah MBBA Cup final an chak leh chiah. TBL hian a zawn zatin final-ah TBL vawi thum an hneh a, tualchhung basketball roreltu thar an ni tih an nemnghet.

November 28, Thawhlehni zana Hawla Indoor Stadium, Republic Vengthlanga inkhelah Vanlalṭhazuala a hmuhnawm a, TBL chakna hnar a ni. Chutihrualin Michael Liansanga (Big Mike), Lalliansanga (LS-a), Emmanuel VL Awmpuia leh Eddie Zaithanmawia te hnahthawh hmuh hmaih a thiang lo.

TBL coach H. Lalhruai-tluanga (Ahruaia) chuan, "Player-te inpekna rah a ni a, club neitu TBL chhungkua min thlawp ṭhat vang a ni. A zawna nomawi pathum kan chawi hi kan lawm a, Pathian malsawmna kan dawng takzet," tiin Vanglaini a hrilh.

MBBA chuan Basketball Federation of India (BFI) buatsaih National Basketball Championship-a Mizoram aiawha kal turin Khatla TBL hi a thlang tawh a, inelna hi December 3-10, 2023 chhung hian Ludhiana, Punjab-ah neih a ni ang.

Ahruaia chuan, "Mizoram aiawha kan kal tur hian team a tiphur a, player-te an ṭang hle. Final-a hnehna kan chan theihna kawngah pawh kan inpuahchahna ṭha hi a lang a, player bakah assistant coach Simon-a te thawhrimna hi sawi hmaih a thiang lo," tiin a sawi.

Zarkawt BCA hi a zawna vawi thum an chak loh avangin an tla chhe ta tihna a la ni lo a, MSL9-ah chuan TBL lakah phuba lak ngei an tum dawn. BCA hian Lalrina Renthlei, Zonunsanga leh Matthew Sailo te an neih sa bakah Lalhmachhuana leh R. Lalnunpuia te an neih belh. Tun ṭuma Khatla TBL laka an tlawmna hi MSL9 atana BCA fuih phurtu tur a ni.