Zaninah Inter Village Futsal Final : Sihphir Venghlun Vs Electric Veng

D. Buanga & Sons Inter Village Futsal Tournament 2023 final chu zanin hian Philip Remthanga Indoor Stadium, Tlangnuamah khelh a ni dawn. Futsal thiam veng pahnih Sihphir Venghlun leh Electric Veng ten nomawi an inchuh dawn a, LPS Vision-ah tihchhuah a ni ang.

Inelna hi Mizoram Football Association leh Tlangnuam Games & Sports Association buatsaih a ni a, lawmman pawh a ṭha. Champion team hian nuai khat leh nomawi an dawng dawn a, final-a inkhel tur team pahnih an ṭhat bawk avangin futsal ngainatute tan hmaih phal chi an ni lo ang.

Sihphir Venghlun an ṭha

Tualchhung football tui satliah chuan football-a Sihphir Venghlun hmasawnna hi an hmu thiam lo ang, mah se a tuichilh tak tak chuan Sihphir Venghlun ṭhatzia hi an hria ang. First Division inelnaah season liam ta khan Sihphir Venghlun hi an champion a, kuminah semifinal-ah vanduai mah se an game a mawi hle.

Football-a an ṭhat ai mahin futsal-ah an ṭha a, futsal-ah kher chuan a ṭha ber zinga ngaih an ni sa. Season liam ta khan Sihphir Venghlun club Goshen FC chu Division One-ah an champion a, Goshen FC hi kum 2018-a din niin tunah chuan Futsal League club an ni tawh.

Final lut tur pawhin Sihphir Venghlunin India international David Laltlansanga awmna Chawnpui 5-3 in an hneh. Avida hmangin Chawnpuiin hma hruai mah se a tawpah chuan team anga ṭha zawk Sihphir Venghlunin hnehna an chang a, goal hnih khungtu PC Lalruatsanga chu man of the match-a thlan an ni. Final-ah pawh an fitness ṭhatna leh 'teamwork' hi an innghahna tur a ni ang.

Electric a êng

Electric Veng hi chu fak leh chuan an ngai tawh lo a, ṭha sa an ni. Futsal khelhna hmun ṭha an nei a, MFA Futsal League-ah an tel ringawt lo an champion tawh. Kumin khan Mizoram aiawhin India ram pum inelna Hero Futsal Club Championships-ah an tel hial.

Electric Veng hi kum 2010-a Red Ribbon Football champion ṭuma player pawimawh Lalhlimpuia'n (Tata) a ho a, Tata hi goal khungtu pawimawh a nih bakah coach hna a chelh bawk. Tata hian Electric Veng player-te a hrechiang a, goalkeeper Lalrinzuala chu player pangngaiah chhawrin semifinal-ah Rinzuala hi man of the match-ah thlan a ni hial.

Inelna ṭantirha champion rinkai zinga mi Ramhlun Vengthar chu Electric Veng hian 8-2 in an hneh a; Rinzuala bakah Samuel Lawmsiamkima, Tata leh Lalrinsanga ten goal hnih ṭheuh an khung. Player pawimawh zingah Lalsangkima hming lam hmaih a thiang lo a, chutihrualin Electric Veng ṭhatna chu an rilru huaisena hi a ni.