MPL Board-in MPL club-te thu thlen an pawmsak

Mizoram Premier League club parukin November 24, Zirtawpni khan MPL Board hnenah thu thlenin kumin chhunga MPL khelh zawh an dil a, MPL Board chuan November 28, Thawhlehni khan thuchhuah siamin club-te ngenna an tihlawhtling.

MPL Board chuan nimin khan Zote Toyota MPL10 fixtures thar an ti chhuak a, league round hi December 14, Ninganiah khelh zawh a ni dawn. Semifinal hi December 18-19, 2023-ah khelh a ni dawn a, double leg ni tawh loin single leg tawp a ni ang. Final hi December 22, Zirtawpni khelh tur a ni.

Club Ngenna leh Board Thutlukna

Mizoram Premier League club paruk FC Venghnuai, Project Veng FC, Electric Veng FC, Chawnpui FC, Chanmari FC leh Chhinga Veng FC ten MPL Board-ah kumin chhung ngeia inelna zawh an duh thu an thlen a, inelna hi nakkuma neih a nih chuan club ṭhenkhatin player hlawh pek tur an neih loh tur thu an ziak tel.

November 28, Thawhlehni khan MPL Board leh MPL Club aiawhten joint meeting an nei a, club-te harsatna hriatthiam puiin December 2023 chhung ngeia khelh zawh ni se tiin thutlukna an siam.

A nghawng chu

MPL Board thuchhuah hian Aizawl FC-ah nghawng lian tak a nei dawn. Mizo club hi I League khelin an zin chhuak mek a, I League leh MPL an khelh kawp a ngaih dawn tak avangin Mizoram chhunga inelna sang berah an player neih ṭhat ber an chhawr thei dawn lo.

Aizawl FC hi match 10 khelh zawhah panganaah an awm mek a, match tam zawkah an ṭhat dan bera an inlan theih dawn loh avangin semifinal khel lo thei dinhmunah an ding. Season liam ta khan AFC hian semifinal thleng mah se final an thleng zo lo a, kuminah pawh champion chu sawi loh knockout stage thlen hrim hrim a har dawn.

Chutihrualin MPL Board hian Aizawl FC hi an state pawn player neihte MPL khel thei tura ziahluh an phalsak dawn a, team ṭha tak an la ni dawn. Player ziahluh thar zingah Sudeva Delhi FC aṭanga an laklet defender Lalfelkima te pawh an tel thei ang. Mizo player ṭha la khawm thei hi an ṭhat dan berin khel thei lo pawh ni se dah hniam theih an la ni lo. Goalkeeper-ah pawh kumin CYMA Football-a best goalkeeper Joel B. Lalramchhana te an la ni ang.

A hmuhnawm dawn

Aizawl FC hian round 11-ah Mizoram Police an hmachhawn nghal dawn a, BS-a Colney kaihhruai Police hi pakhatna ni mah se panganaa awm I League club nen an inthlauhna hi point li chauh a ni. Inkhel hmuhnawm bik an chhawp chhuak ang.

Club panga Mizoram Police, Chanmari FC, Chawnpui FC, Chhinga Veng leh Aizawl FC ten semifinal hmunruak an inchuhin ngaih theih a, pakhat an tla dawn. Tun dinhmunah I League club dinhmun a chhe rih ber.