Magpies beiseina a zam ral dawn em ni?
Parc des Princes-ah Newcastle United-in hnehna ropui tak an chang dawn emaw an inti hman a, mahse, hun pek belhah French club-in sawisel theih takin penalty an hlawh chhuak a, Kylian Mbappe chuan goal-ah a chantir.
Alexander Isak-a goal hmanga chak beisei Newcastle an chak zo lo a, PSG nen 1-1 in an inhnehtawk. PSG-in match nga an khelh aṭangin point sarih an nei a, pahnihna an ni - Magpies erawh point nga nen pathumna an ni thung.
Khualmuala 3-1 a AC Milan hnehtu Borussia Dortmund chu hmahruaitu an ni a, last 16 an lut tawh - PSG, Magpies leh AC Milan ten beiseina an la nei vek a, German club hnung zuitu tur a la chiang lo.
Group stage match tawp berah Newcastle leh AC Milan an la intawng leh dawn a, team pahnihin last 16 luh an beiseina chhi nung turin chak an mamawh ve ve a, Dortmund-in PSG an hneh a ṭul dawn bawk - a tawp thlengin a ngaihnawm dawn e!
Magpies beiseina
Newcastle-in last 16 beiseina nei turin chak an mamawh tih an hria a, fimkhur pawh an fimkhur hle. Mahse, hliam ngah vangin Newcastle hi duh ang takin an inrem thei lo a, bench-ah pawh kum 20 tling lo player pali an dah a ṭul a, goalkeeper pahnih an awm bawk!
Magpies-in hei hi hnual phah nan erawh an hmang duh lo - minute 24-naah Isak hmangin goal hmahruai an khung hial a, Premier League club hian an intawn hmasaka 4-1 a an lo hneh tawh team lakah fimkhur takin an khel zui.
PSG-in point an hlawhchhuah zawh loh chuan beisei a bo dawn tih an hria a, na takin Newcastle an nawr. Mahse, Magpies tan goalkeeper Nick Pope a che ṭha a, Bradley Barcola khung ngei tura lang a dansakte chu pui tak a ni.
Kylian Mbappe pawhin a chance neih a chhawr thei bik lo a, PSG lu a hai - inkhelh chhungin vawi 31 ngawt shot an nei a, heng zinga pasarih ngawt chu goal zawnah a kal.
A tawpah
Vai film hmuhnawm tak ang mai a ni - a tawpah a changtupa a che ang maiin! Magpies an ṭang khawng a, an ṭang tlang mai dawn niin a lang hman. Mahse, hun pek belh minute riatnaah PSG-in penalty an hmu tlat.
Ousmane Dembele-a ball cross chuan Tino Livramento-a awm a per a, a per lehlam hian Livramento kut a fuh - referee Szymon Marciniak chuan video assistant referee a rawn zui a, penalty 'spot' a kawk!
Mbappe chuan goal-ah a chantir a, Newcastle an na vawng vawng. Hemi hma hian Magpies hian Anthony Gordon hmangin penalty an hlawh chhuakah an inngai a, referee-in a pe lo thung. Sawisel theih takin PSG-in penalty an hmu leh si a, Magpies tan a na.
Paris khawpuia chak inring tawh Newcastle-in point khatah lungawi an zir a, last 16 luh chu an kuta innghat a nih tak loh avangin an tan a thiam 16 zinga tel chu a harsa tawh ang.