Round of 16 khel tur Dortmund

Bundesliga lamah beisei phak lo mah se Borussia Dortmund chuan Champions League lama 'group of death' hming lem an pek, group F aṭanga round of 16 khel tura tling hmasa ber ni turin Thawhlehni zan khan an hming an ziak kai - an mikhualna ramah AC Milan chu 3-1 in an hneh a, knockout round an lut.

San Siro-a inkhelah minute 10 chhungin penalty vawi hnih kan hmu nghal! Mahse, penalty hmu hmasa zawk AC Milan tan Olivier Giroud chuan a chance neih goal-ah a chantir thei lo a, an hun ṭha neih a bawhpelh.

Minute 10-na a ni a, Dortmund penalty hlawhchhuah hun a ni ve thung. German club tan Marco Reus chuan an hun ṭha a khawhral ve lo a, mikhualna ramah a team hi 1-0 i hma a hruaipui. Mahse, Dortmund hian rei tak erawh hma an hruai bik lo a, Samuel Chukwueze chuan minute 37-naah khung ve lehin, 1-1 a ni.

Goal dang lut loin chawlhlawk hman a ni a, mahse, second half-ah Milan beiseina a thamral. English rawlthar Jamie Bynoe-Gittens chuan minute 59-naah an goal hnihna a khung a, a hnu minute 10-ah Karim Adeyemi chuan chak nemnghehna goal a khung bawk.

Dortmund-in round of 16 an lut a, Milan erawh last 16 lut tur chuan match tawp bera Newcastle an hneh bakah, Dortmund-in PSG an hneh tel a ngai bawk ang - thil theih loh a ni lo na a, beiseina erawh a tlem tawh hle.