Haaland-a 'record' nen City an 'comeback'

Manchester City-in 2-0 a an hnufual hnuah RB Leipzig lakah goal hnih an khung a, an mikhual hi 3-2 in an hneh let daih - Erling Haaland chu City tana goal khungtu zingah a tel leh ta a, Champions League record a siam nghal.

Thawhlehni zan inkhelah Leipzig-in goal an khung hmasa a, Lois Openda chuan minute 33 chhungin goal hnih a khung - Belgian forward hi Leipzig chuan nipui lai khan Lens aṭangin an la lut a, pound maktaduai 38.95 thlenga a man sang chho thei tur niin an club player man to ber a ni.

Mahse, second half-ah City-in an theihna tak tak pholangin, goal an khung ṭan a, minute 54-naah Haaland chuan si phurh a sut ṭhen - Champions League-ah goal 40 a khungna chiah a ni a, heti zat goal khung tur hian match 35 bak a mamawh lo.

Haaland hi Champions League-a goal 40 khung tling tura match mamawh tlem ber a ni nghal a, a hmaa record chelhtu Ruud van Nistelrooy aiin match 10-in a mamawh tlem zawk!

City tan Phil Foden leh Julian Alvarez ten goal khat ve ve an khung leh a, first half-a 2-0 a hnufual City kha 3-2 in an chak daih - Manchester khaw club hian match khat khelh tur la nei chungin table chung ber an luah chiang a, Leipzig pawh tlawm mah se round of 16 an khel tho ang.

Group G inkhel dangah Young Boys chuan 2-0 in Red Star Belgrade an hneh a, Kosta Nedeljkovic chuan an lamah tilutin, Swiss club tan Lewin Blum chuan a khung ve leh bawk.