Barcelona tan beiseina thar

La Liga lamah rin loh taka an chak zawh loh hnuin Barcelona an 'comeback' leh ta a, an mikhual FC Porto chu 2-1 in an hneh - Champions League round of 16 an lut a, Porto erawh inkhel lehlamah Shakhtar Donetsk an chak avangin an dinhmun a la chiang lo.

Porto tan Brazilian winger Pepe chuan minute 30-naah goal hmahruai a khung a, mahse, an hlim chhung a rei lo. Minute hnih hnu lawkah Joao Cancelo chuan Barca tan si phurh sutna goal a khung a, Joao Felix chuan minute 57-naah chakna goal a khung zui.

Portuguese club tan goalkeeper Diogo Costa a che ṭha takzet a, Felix-a'n Barca goal hnihna a khung hma hauhin save engemaw zat a nei - a tawpah erawh a dingchang thei reng ta bik lo a, Barca an chak.

Group H inkhel dangah Shakhtar Donetsk chuan 1-0 in Royal Antwerp an hneh a, Mykola Matviyenko chuan inkhela goal awmchhun a khung. Ukrainian club Shakhtar hi Porto nen an point hmuh zat a inang a, Barca hnungzui tur a la chiang lo.

Club pahnih hi group stage match hnuhnung berah an intawng dawn a, head-to-head a dinhmun ṭha zawk Porto tan draw result a tawk laiin, Shakhtar tan erawh tlang turin hnehna chan ngei ngei a ngai dawn thung.