Atletico Madrid an tlang e

Season hmasa khan Atletico Madrid-in Porto, Bayer Leverkusen leh Club Brugge te nena awm hoin Champions League group stage-ah a mawng phah an luah a, last 16 an lut lo chiang hle.

Tun season-ah erawh thawnthu her danglamin a awm leh ta a, match khat khelh tur la nei chungin Champions League round of 16 an lut fel der - Thawhlehni zan khan Feyenoord chu khualmualah 3-1 in an hneh.

Feyenoord khelmuala goal li lut zinga goal thum hi Dutch club-in an khung a ni a, mahse, mahni lamah vawi hnih an tilut a, a pawi zo ta - minute 14-na lekah defender Lutsharel Geertruida chuan Marcos Llorente-a cross aṭanga ball kal chu an lamah a tilut a, second half ṭantir lamah Mario Hermoso chuan Atletico tan a khung belh bawk.

Dutch team tana beiseina siam turin Mats Wieffer chuan khung ve leh zuk mah se, Santiago Giménez chuan an lamah a tilut leh a, hun tawp thlenga goal dang lut loin 3-1 in Atletico an chak.

Group E inkhel dangah Lazio chuan 2-0 in Celtic an hneh a, Ciro Immobile chuan goal hnih a khung - Lazio hian Atletico hnungzuiin last 16 an lut a, match nga aṭanga point khat chiah la nei Celtic erawh palina ni chungin European football-a club inelna sang ber an mangṭha ang.