Europa League-ah Liverpool an inlan dawn

Premier League-a Manchester City nena inkhel zo hlim Liverpool-in tun season-ah Champions League khel phak lo mah se European football khelh tur erawh an nei tho a, zanin dar 1:30 hian Europa League-ah LASK an mikhual dawn.

Anfield-ah Reds tan draw result chu knockout round luh nan a tawk a, mahse, last 16 lut nghal tur erawhin group hmahruaitu an nih a ṭul - zaninah an chak a, Toulouse-in an mikhual Union SG an hneh loh bawk chuan match khat khelh tur la nei chungin last 16 an lut chiang ang.

Europa League-ah hian group hmahruaitute chu round of 16 khel turin an tling nghal a, pahnihna erawhin knockout round play-off ah Champions League aṭanga tla thlate nen round of 16 luh an inchuh leh phawt dawn.

Jurgen Klopp-a'n Europa League an khel rau rau a nih chuan champion a duh ang tih a chiang a, chuti a nih chuan group hmahruaitu ni chunga round of 16 luh hmasak phawt hi a hna hmasa tur chu a ni ang.

Alisson a awm lo

Liverpool tan goalkeeper chhuanvawr Alisson chu Manchester City nen an inhmachhawn ṭumin a inhliam a, hei vang hian Brazilian keeper tel loin Liverpool an inlan dawn - hlauhthawn lutuk tur erawh a ni lo.

Alisson hi dam pawh ni se a inlan a rinawm kher lo a, Jurgen Klopp-a'n cup inelna lamah Caoimhin Kelleher a chhawr ṭhin avangin Irish keeper hi si ban nghak tura beisei a ni sa hrim hrim - zaninah Reds jersey hain a inlan ang.

City nena an inkhelh ṭuma inhliam zingah Diogo Jota a tel a, hei pawh inngaihtuah buai viauna tur awmin a lang lo. Reds hian Mohamed Salah, Darwin Nunez, Cody Gakpo leh Luis Diaz an la nei.

Tlarhnungah Trent Alexander-Arnold hoin Ibrahima Konate, Jarell Quansah leh Joe Gomez te ho intlar tura beisei an ni a, midfield-ah Wataru Endo, Harvey Elliott leh Ryan Gravenberch te pawhin hmun an chang ve leh tura ngaih a ni.

LASK an ṭha?

Austrian club LASK-in an ram league table-ah pathumna dinhmun an luah mek a, Europa League-ah erawh a mawngphah an ni - chutihrual chuan match hnih khelh tur a la awm avangin beisei an la nei a, Anfield-ah thih tha nen an bei ang.

LASK manager Thomas Sageder pawhin Liverpool-ah an zin satliah dawn lo tih sawiin, Sageder chuan, "Khualzin satliah ang maiin kan kal dawn lo. Football game kan khel dawn a, chak chance kan nei a ni.

"Liverpool pawhin an theihna zawng zawnga an beih let ngai tur khawpin kan khel ang," a ti a, Anfield-ah fixture tihlawhtling satliah tura zin an tum loh thu a sawi.

LASK hian Europa League-a an match hnuhnung berah Union SG chu 3-0 in an sawp a, hei vang hian inrintawkna an nei ang - Anfield boruak erawh Union SG nen khaikhin a rem dawn lo.