Australia an chak ve ta

Australia-in India nen T20 series an khelh mekah hnehna an chang ve ta a, Barsapara Stadium, Assam-ah wicket ngain hnehna an chang. December 1, Zirtawpni hian Raipur-ah match lina an khel dawn a, India hian 2-1 in hma an hruai mek.

Thawhlehni zan inkhelah Australia-in vawm hmasak an thlang a, India-in bul an ṭan ṭha hle. Opener Ruturaj Gaikwad-a'n century a siam a, 123 runs zet siamin a thi lo. Captain Suryakumar Yadav-a'n 39 runs rawn belh bawkin Men in Blue hian 222 runs an siam a, chakpui tham a ni.

Aussies opener Travis Head (35) leh Aaron Hardie (16) te che ṭha tawk lo mah se World Cup-a thilmak thlentirtu Glen Maxwell a rawn inlar a, hun harsaah Aussies hnehna an chanpui.

Over tawp berah Australia-in 21 runs siam an la mamawh a, India tan Prasidh Krishna-a'n a rawn vawm. Matthew Wade-a'n four runs a vuak hnuah run khat a siam. Ball li a la awmin Maxwell-a hun a inṭan a, six vawi khat bakah four vawi li vaw chhuakin Australia an chak. Maxwell hian ball 48-ah 104 runs siamin century a siam a, Australia chak theih nan a thawh hlawk hle.