FIFA U17 World Cup final-ah Germany vs France

FIFA Under-17 World Cup vawi 19-na chu Indonesia-ah khelh mek a ni a; December 2, Inrinni hian final khelh tur niin Germany U17 leh France U17 te an inhmachhawn ang.

Germany U17 hian final lut turin Argentina U17 chu hun pangngaiah 3-3 a an inhnehtawk hnuin penalty shootout-ah Germany an vannei ta zawk. Manahan Stadium, Surakarta-a inkhelah Germany-in bul ṭan ṭha mah se Agustín Ruberto hattrick hmangin Argentina-in injury time-ah si phurh an sut zo.

Ruberto hi River Plate youth team-a awm lai a ni a, Brighton & Hove Albion pawhin an lo ngaihven tawh. Tun inelnaah goal riat khung tawhin top scorer a ni mek a, inelna a zawh meuh chuan kum 17 mi Ruberto ngaihventu an tam tawh khawp ang.

Semifinal hnuhnung zawkah France U17 leh Mali U17 te an inkhel a, team pahnih an inkhel tawk hle. First half-ah phei chuan Mali an khel ṭha zawk hial a, injury time-ah Ibrahim Diarra hmangin an khung hmasa a, France goalkeeper Argney tih ṭhat tawk loah a ngaih theih.

Second half-ah pawh Mali-in chance ṭha an nei hmasa zawk a, right back Souleymane Sanogo chetsual an tuar. Sanogo hi hnawhchhuah a ni a, a freekick chawina aṭang chiahin France-in si phurh an sut - Yvann Titi-a'n a tauh goal. Ismail Bouneb-a'n minute 69-naah freekick aṭangin chakna goal a khung a, player 10-a khel Mali an tho chhuak tawh lo.

FIFA World Cup U17-ah hian champion lai chu Brazil an ni a, vawi li an champion tawh. Nomawi chawi ngun ber erawh Nigeria niin vawi nga an champion tawh a ni.