Mumbai an tlawm leh tawh

AFC Champions League-ah Mumbai City tan ni a êng thei lo a, Indian Super League club hian Thawhlehni zan khan Iranian club Nassaji Mazandaran chu 2-0 in an ngam lo leh tawh - match nga an khelh tawhah an tlawm vek a, match khat khelh tur la awm mahse table mawngphah luah chungin Champions League an mangṭha dawn tih a chiang tawh.

Nassaji tan hian Mohammad Reza Azadi leh Halen Nongtdu (own goal) ten goal khat ve ve an khung a, Mumbai lamin a chhanletna tur an neih loh avangin 2-0 in an tlawm - Nassaji hian match nga aṭangin point ruk an nei a, Mumbai laka an hlawhchhuah ve ve a ni!

Mumbai City hi an coach Des Buckingham chuan League One club Oxford United coach ni turin a chhuahsan a, assistant coach Anthony Fernandes hoa inlanin, player langsar karah khel tam lo leh naupang deuhte chance pek an ni bawk.

ISL club tan hian AIFF Player of the Year Lallianzuala Chhangte leh Lalengmawia Ralte chu player langsar zinga inkhel bul ṭan an ni a, defender Hmingthanmawia Ralte (Valpuia) chuan inkhel bul a ṭan bawk - Mumbai hian Indian player hlangin an khel!

Mumbai awmna group D aṭang hian Al Hilal chu hmahruaitu niin round of 16 an lut chiang a, pahnihna Navbahor tan pahnihna ti ṭha pathum zinga tel a, round of 16 luh chu beiseina a ni.