MPL boruak 'hot' hun a thleng ta : Chhun dar 12-ah Chawnpui FC Vs Chanmari FC
Zote Toyota MPL10 chu kuminah khelh zawh a ni dawn a, semifinal khel tur a la chiang lo - round li khelh hmabak hi a pawimawh vek dawn. Vawiin chhun dar 12:00 hian RG Stadium-ah Chawnpui FC leh Chanmari FC te an inkhel dawn a, pahnihna leh pathumna inkhel tur ni mah se a chak zawk hi table chung berah an awm thei ang.
Phase 1 khelh zawh khan Chanmari hian point 17 hmuin hmahruaitu an ni a, Chawnpui hian point 15 an hmu thung. Phase 2-ah match thum khelh a ni leh tawh a, team pahnih hian point hnih ve ve chauh an hmuh belh. Chanmari leh Chawnpui te hi hmahruaitu ni thei an nih rualin semifinal khel lo thei dinhmunah an ding a, hei tak hi inkhel pawimawhna tur a ni.
Chak a pawimawh
MPL-ah hian away goal rule an dah bo tawh a, chutihrualin goal difference aiin head to head an en hmasa. Chanmari leh Chawnpui hi an inkhelh hmasak zawk ṭumin goal awm loin an inhnehtawk a, tun ṭuma chak zawk hi head to head-a chungnung zawk tur an ni.
League round khelh zawhah team pahnih point hmuh zat hi a inang a nih chuan vawiina chak zawk hi a sang zawka awm tur a ni a, hei vang hian hnehna chang zawk hian point thum bakah hamṭhatna tlem an dawng tel ang.
Mapuia leh Zozoa
Santosh Trophy group stage-ah Mizoram tan Lalkhawpuimawia'n (Mapuia) goal riat zet a khung a, India ram puma goal khung tam ber a ni. Chanmari hian Mapuia bakah Mizoram tana goal pawimawh khungtu Laltlanzova (Zozoa) te an kawl.
Amritsar, Punjab ṭanga a haw hnuah Mapuia leh Zozoa te hian goal an la khung miah lo. Mizoram team-ah pawh khelhna hmun chang pha Lalthangliana'n (AB-a) MPL10-ah goal a la khung miah lo bawk.
Chanmari FC-in semifinal khelh theihna ticket nei turin an player langsar te hi an pawimawh a; Mapuia leh Zozoa ten an pet goal theihna 'boot' an rawn thawhchhuahpui a ṭul ang. Chutihrualin Chanmari hian goal khung turin R. Laldanmawia leh Lalrammuanpuia (Apuia) te an kawl tih hriat a ṭha.
Thanga a la damlo
Chawnpui FC-in an innghahna VL Thanga inhliam an tuar a, Hualngohmun tlangval hi training-naah a ke a bilh avangin phase 2-ah a la inlan lo. Thanga awm lo hi Tea Chinzah leh K. Lalrosanga te tan hming chherna hun ṭha ni mah se tun thleng chuan a hmun ruak hnawhkhat thei an awm lo.
Coach Lalrindika Hmar-in an goal nawr dan a en nawn a ngai dawn a, goal khung turin an winger-te bakah an wing back Laltluangliana leh Lalbiaknia te cross ball a ṭhat hret a ṭul ang. Chanmari captain Lalrinchhana Tochhawng leh a hote su turin David Laltlansanga (Avida) emaw David Lalchhuanawma emaw te an awm thei a, Rindika Hmarin match hnuhnung bera khel ṭha zawk Avida nge tharum ngah ṭha zawk David-a a thlan dawn tih hriat a châkawm viau bawk.
Midfield battle a pawimawh dawn a; Chawnpuiin Peter Lalrinhlua, Lalruatfela, Lalbiakzuala leh Vanlalremkima te an nei a, heng zinga pathum hi an lut dawn. Chanmari lam pawhin AB-a, Thanglalven Gangte leh Crespo Vanlalhriatpuia te an kawl. Mahse, Chawnpui lakah Gangte hi inhliam vangin a khelh theih a rinawm lo a, Sialhawk tlangval Crespo erawh a dam tawh avangin bul a ṭan theih a rinawm.
Chawnpui lam hian tlarhnungah Lalruatfela leh Lalhmangaihsanga te an inkawptir a, anni pahnih hi MPL10-a defender lai inkawp fuhte zinga mi an ni. Tawnhriat nei ṭha Kelkang striker Mapuia leh tharum ngah Hmangaihsanga te insu tur chu a en tlak khawp ang.