Man United-in Champions League an mangṭha hnai

Manchester United-in Istanbul-ah duhthusamin inkhel bul ṭan mah se goalkeeper Andre Onana chet ṭhat tawk loh avangin an hun ṭha neih an bawhpelh a, Galatasaray nen 3-3 in an inhnehtawk. Champions League group A inkhel dangah Bayern Munich leh Copenhagen te goal awm loin an inhnehtawk a, hei vang hian Erik ten Hag-a hote tan last 16 lut turin thilmak a thlen a ngai tawh.

Nilaini zan inkhelah Man United-in minute 18 chhung lekah Alejandro Garnacho leh Bruno Fernandes te hmangin 2-0 in hma an hruai a, Hakim Ziyech-a freekick hmangin Galatasaray-in si phurh an sut ṭhen. Second half-ah Scott McTominay hmangin hma hruai nawn mah se Ziyech hmang bawkin mualneitu lamin an sut ṭhen a, substitute Kerem Akturkoglu hmangin Galatasary-in an sut zo. Ziyech-a freekick pahnihah hian United keeper Onana-a'n a tihtur a ti lo.

Harhtharna chu

Dutch manager Ten Hag-a'n Everton an hneh ṭuma starting eleven a siksawi hret a, Kobbie Mainoo aiah tawnhriat nei ṭha zawk Sofyan Amrabat luhtirin Anthony Martial aiah UCL-a goal khung thei Rasmus Hojlund a luhtir a, hrem vanga khel thei lo Marcus Rashford aiah Antony rawn lutin Diogo Dalot aiah Aaron Wan-Bissaka hmel hmuh tur a awm bawk.

Galatasaray lamin ball chang tam mah se Man United-in bul an ṭan ṭha thlawt a, Everton laka goal ropui khungtu Garnacho-a'n goal ṭha bik khungin captain Fernandes pawhin Argentine winger goal khung tluk zeta ṭhain a khung bawk. Minute 18-naah Man United-in 2-0 in hma an hruai tawh a, Everton an hneh tel dan thlir telin kawng dik an zawh dawn niin a lang.

Minute 29-naah Onana chesual zeuh mah se minute 55-naah United-in Galatasary tlarhnung ṭhiatin Wan Bissaka cross chu McTominay-a'n ṭha zetin a khung. First half-a goal hniha hmahruaitu Man United-in second half-ah pawh goal hnih thoin hma an hruai leh a, an dinhmun a ṭha hle.

Welcome to Hell

Istanbul hi mikhual team tana inkhelh harsatna hmun a ni a, Galatasaray ṭantute hian an khingpuite chungah zahna an lantir ngai lo. Banner lian tak 'Welcome to Hell' keng chungin mikhual team an lo chhawn ṭhin a, tun ṭumah pawh hian a danglam lo.

Minute 29-naah ball pet thiam Ziyech-a'n box pawn chiah aṭangin freekick a pet a, Onana-a'n a rin sual avangin a ke bul maia ball kal a chhuah. United keeper Onana-a'n 'risk' laa wall lama dive a tum hi a mak a, an wall-a Galatasaray player pahnih ngawt an dintir ve kha a mak bawk.

Istanbul boruakin Onana a hmet chho ṭan a, United keeper hi insiamṭha loin a chesual nawn. Minute 62-naah Ziyech-a freekick pet chu substitute Martial-a'n an lamah a tauh thawi a, Onana-a'n a awm zawna ball kal chu a hui lut. Galatasary-in beiseina thar neiin an phur phah hle. Substitute Akturkoglu-a'n kawh zetin minute 71-naah a khung belh leh a, goal thumnaah erawh Onana dem theih a ni lo thung.

Football danglam chu

Modern football-ah hi chuan manager-ten tlarhnung an rem phui ṭha a, goal khung tluk zetin goal venhim an ngai pawimawh a, manager ṭhenkhat phei chuan an ngai pawimawh hial zawk. Man United leh Galatasaray inkhel erawh hun tawp lamah goal venhim nachang an hre lo a ni ber a, team pahnihin chance ṭha an inneih chhawk zak zak.

Goal ruk luhna inkhel hi goal 10 luhna inkhel pawh ni se a mak lo ang tih tur khawpin chance an nei ngah a, mahse minute 71 hnuah goal dang hmuh tur a awm tawh lo. Fernandes-a'n box pawn aṭangin goal ban a pet per a, offside vanga Mauro Icardi goal an pawm loh bakah Wilfried Zaha-a'n chance ṭha a hlah ve tho avangin 3-3 hi result awm tak a ni.

An dinhmun chu

Group match tawp berah point nga hmu pahnih Copenhagen leh Galatasaray te an inkhel dawn a, heta chak zawk hian Bayern Munich hnung an zui ang. Team pahnih hi an inhnehtawk hlauh erawh chuan Man United tan beisei tur a awm dawn a, team ṭha ber Bayern an hneh theih chuan last 16 an lut ang.

UCL-a pathumna hian Europa League an khel thei a, Ten Hag-a hote hian knockout stage an lut thei ta lo a nih pawhin Bavarians a hneh phawt chuan Europa League playoff round an khel thei dawn a ni.