Mizoram an chak a ngai

Hero Junior National Football Championship for BC Roy Trophy-ah Mizoram tan semifinal lut turin vawiin chawhma dar 9:30 hian Uttar Pradesh an hneh ngei a ngai a, Mizo-ram hmabak a hautak hle.

Shillong-a inelna neih mekah hian Mizoram hi group A-ah Uttar Pradesh (4 pts), Goa (2 pts) leh Delhi (0 pt) te nen an awmho a, Goa nen an inhnehtawk hnuah Delhi 2-1 chauhin an hneh. Group pakhat aṭangin team khat chauhin semifinal an luh dawn avangin Mizoram hian Uttar Pradesh nen an point hmuh zat inang mah se chak an mamawh.

Mizoram manager Hmingthansanga chuan, "Chak mamawh zawk nih chuan kan dinhmun chu a ṭha lo. Harsatna belhchhah turin defender Lallungmuana, winger Lalmuanpuia leh striker Rohlupuia te kan chhawr thei lo bawk. Chutihrualin semifinal lut turin beiseina sang tak kan nei a, Uttar Pradesh hi kan hneh theih ngei kan ring," tiin Vanglaini a hrilh.

Group A inkhel dangah vawiin chawhma dar 9:30 hian Goa leh Delhi an inkhel dawn a, Mizoram leh Uttar Pradesh hi an inhnehtawk a nih chuan Goa tan beisei tur a awm ang.