Allianz Arena-ah Leipzig-in Bayern chelh

Bundesliga-ah table-a a sang pahnih Bayern Munich leh RB Leipzig te an inhmachhawn a, goal awm loin an inhnehtawk. Bavarians-in match 21-ah point 43 an hmu a, Julian Nagelsmann enkawl Leipzig-in point khat chauhin an pha lo. 

Bayern Munich-in season sarih chhung Bundesliga nomawi an chawi zawn tawh a, tun season-ah erawh nomawi humhimna kawngah harsatna an tawk. RB Leipzig chauh hi Bayern elpui an ni lo a, pathumna Borussia Dortmund (39), palina Borussia Monchengladbach (39) leh Bayer Leverkusen (37) te hi chhiarkawp dan aṭang chuan nomawi beisei thei an la ni.

Bayern Munich-in DFB Pokal-a Hoffenheim 4-3 a an hneh ṭum aṭangin Corentin Tolisso leh Philippe Coutinho te la chhuakin an aiah Thiago Alacantara leh Leon Goretzka te an lut thung. Kingsley Coman leh Lucas Hernandez te chu hun rei tak an inhliam hnuah bench-ah dah an ni a, substitute aṭangin luhtir ve ve an ni bawk.

Leipzig hi Joshua Kimmich-a'n professional match a khelh ṭanna a ni a, Germany international hi Bayern midfield-ah Thiago nen an awm. Tlarhmaah Robert Lewandowski a awm a, Hans-Dieter Flick-a'n a sa huai a serah a ngaih theih.

Leipzig chetfuh loh a kaltluang a, Bundesliga-a Eintracht Frankfurt an hneh loh hnuah Gladbach nen an inhnehtawk. DFB Pokal-ah Frankfurt an hneh lo nawn a, match hnuhnung pathumah chak an nei lo. Nagelsmann-a'n Frankfurt an hneh loh ṭum aṭangin pali a thlak a, keeper Peter Gulacsi, Timo Werner, Dani Olmo leh Tyler Adams ten bul an ṭan.

Bayern Munich-in bul an ṭan ṭha a, RB Leipzig an bet nghal. Keeper Gulacsi-a'n hna a ngah nghal a, Bayern tlarhmaah Thiago, Leon Goretzka leh Thomas Muller te an hlauhawm nghal. Germany keeper Manuel Neuer-a'n inrintawkna a ngah a, tlarhnung aṭanga ball in pass ṭanin Bundesliga champion lai chu team ṭha zawk an ni.

RB Leipzig an insiamrem hnuah erawh Bayern tlarhnung nuam sain an awm lo a, Jerome Boateng chet muanna lang chhoin second half-ah thlak a ngai hial. Chutihrualin first half-ah Bayern chu team ṭha zawk an ni a, RB Leipzig chance neih ṭhat ber Werner-a'n goal zawnah a pet theih loh avangin Neuer-a'n hna a nei meuh lo.

Second half-ah erawh Leipzig-in chance ṭha an ngah zawk. Captain Marcel Sabizter-a'n yard 10 lek aṭangin a pet over a, vengtu a neih loh bawk avangin goal khung ngeina turah a ngaih theih. Werner pawhin chance ṭha ṭum hnih a hlah leh a, hming chherna hun ṭha a bawhpelh. 

Bayern striker Lewandowski pawhin Dayot Upamecano lakah penalty hlawh chhuak tawhah inngai mah se VAR hmanga ennawn a nih hnuah offside vangin thutlukna sut a ni. Polish striker hian Leon Goretzka nen mawi zetin RB Leipzig tlarhnung an ṭhiat a, amaherawhchu Goretzka ball pet hi Gulacsi-a'n a dang.

RB Leipzig head coach Julian Nagelsmann chuan, "Inkhel pumpui thlir chuan kan khelh dan a lungawi thlak. Goal khung theihna chance kan nei ṭha zawk a, hmang ṭangkai ilang chuan chak thei kan ni. Khelmualah kan theihna kan pholan chuan Bayern nen pawh kan inel tawk. Kan hmalam hun atan Bayern elpha nih hi a ṭha a, tun season-ah erawh palina china awm kan duh. Bayern laka point hmuh hi kan tum ram thlen theihna a ni," tiin a sawi. Leipzig hian Allianz Arena hi vawi li an tlawh tawh a, tun hi point an hmuhna hmasa ber a ni.

Bayern Munich coach Hansi Flick chuan, "Team pahnihin point hmuh kan phu ve ve a, hei vang hian goal chhuah loa point kan insem hi kan lawm ve ve ka ring," tiin an intluktawk thu a sawi. Bavarians hian tun season Bundesliga match 21 an khelh tawhah tun ṭum hi goal an khung loh hmasak ber a ni. Bayern hian February 16 hian FC Cologne an hmachhawn ang.