Chhinga Veng dal theitu FC Venghnuai

Zote Toyota MPL10-ah Chhinga Vengin harhtharna an chang chho mek a, phase 2 inkhel vawi thum an khelh tawhah an la chak vek. Lalsangzuala Hmar hote hian match thuma point kua an hmuh avangin palinaah awmin point 17 an hmu a, pathumna Chawnpui FC nen an point hmuh zat a inang tawh.

Vawiin chawhnu dar 2:30 hian Chhinga Veng hian FC Venghnuai an hmachhawn dawn a, hnehna an chan theih chuan a sang pathum zingah an inhlang chho thei dawn. Chutihrualin Venghnuai hian match hnuhnung berah Project Veng hnehin MPL10-ah a vawi khat nan hnehna an chang a, an phur lai tak a ni.

Hun ṭha chu

Chhinga Veng hian match thumah vawi thum chu an hneh ngei a, an hneh zingah pawh I League club Aizawl FC an tel. Mahse, an khingpuite hi uluk zawka zirchian an ngai. Chhingcows hnehte hi Electric Veng, Aizawl FC leh Project Veng te an ni.

Project Veng hi table mawngphaha awm an ni a, Electric Veng hi Kolasib-a an zuk hnehte kha niin Aizawl FC hi an kim lo. Chhinga Veng hian semifinal khel thei tur 'class' an la khel lo a tih theih a, vawiina an khingpui tur Venghnuai pawh hian relegate pumpelh tumin a kaw tawpah an ṭang mek.

Chhinga Veng tan Venghnuai hi a awlsam dawn lo a, amaherawhchu vawiin tlaia point thum an hmu lo a nih chuan an khelh hmabak chu semifinal khel tura an elpui Chawnpui FC, Mizoram Police leh Chanmari FC te an ni dawn. Match hnuhnung pathum hi Sanga hote tan fiahna tak tak a ni zawk.

Chhingcows chu

Chhinga Vengin khelh dan nghet an nei chho a, chhungkaw harsatna avanga Santosh Trophy zin ta lo MS Dawngliana'n hmun pawimawh a chang. Dawngtea hian Electric Veng an hneh ṭumin goal li a khung a, Venghnuai tan ven uluk a ṭul dawn.

Mizoram tana zin PC Lallawmkima leh Lallawmsanga (LS-a) te erawh an intah hriam hret a ngai dawn a, Venghnuai lakah Electric Veng laka an chance hlah zozai ang kha a hlah nawn chi tawh lo ang. Tlarhnungah Vanlalremruata leh FC Lalhmunmawia te an inkawp fuh chho a, midfield-ah Zonunmawia a hmuhnawm. Mahse, tarlan tawh angin fiahna tak tak an la hmachhawn lo.

Venghnuai hi

FC Venghnuaiin ṭantu an nei ṭha a, tlai dar 2:30-a khelh tur a nih avangin Chhinga Veng aiin ṭantu an nei ṭha zawk dawn. Phase 2 bikah Venghnuai hian chak loh an la nei lo a, match hnuhnung pathum an khelh aṭanga teh phei chuan point nga an hmuh avangin Chanmari leh Chawnpui aiin point an hmu hnem zawk.

Venghnuai hian chawlh an hmang ṭha a, an fitness a ṭha hle. Captain C. Ramdinmawia tawnhriat a pawimawh ṭhin a, midfield-ah talent nei ṭha J. Lalbiakliana (Valpuia) leh Eric Remruatpuia Chhangte te an ṭangkai hle.

Lalhmunmawia (Amawia) pawh season liam taah Chanmari FC tan khel ṭha tawk lo mah se Venghnuai lamah a theihna a pholang ṭan a; C. Ngurnuntluanga pawh langsar vut si loin team tan a ṭangkai ṭhin. F. Malsawmzuala (Tetea) hote hian Chhinga Veng lakah point hmuh ngei an tum dawn a ni.