Goal li khungtu Real Madrid an chak

Real Madrid an chak a, chumi chanchin zui teltu chu Jude Bellingham-a'n goal a khung thu a ni - Nilaini zan khan Champions League round of 16 khel tura tling chiang tawh Real chuan 4-2 in Napoli an hneh a, goal khungtu zingah Bellingham a tel leh ta.

English midfielder Bellingham hian Real tana Champions League match li a khelh hmasakah goal a khung vek a, Real tana hetiang ti thei awmchhun a ni - a che hlek a, record a siam zel!

Real tan Rodrygo, Bellingham, Nico Paz leh Joselu ten goal khat ṭheuh an khung a, Napoli tan Giovanni Simeone leh Andre-Frank Zambo Anguissa ten goal khat khung ve leh mah se awmzia a nei phak lo.

Santiago Bernabeu-a an tlawm avangin Napoli tan last 16 lut turin nghah hret a la ngaih phah a, an match tawp berah Sporting Braga laka point an hlawhchhuah chuan a thiam 16 zingah an tel ang.

A hmuhnawm

Napoli-in Champions League round of 16-a an dinhmun tichiang rang turin chak phawt a ṭul tih an hria a, minute kuana lekah Simeone hmangin goal hmahruai an khung - Atletico Madrid manager Diego Simeone fapa hmangin Napoli-in Santiago Bernabeu an ngawihtir.

Mahse, Italian club hlim chhung erawh rei lo tak a ni. Goal an chhuah aṭanga minute hnihna lekah Rodrygo chuan mawi zetin Real tan si phurh a sut a, Brazilian forward hian Real tana a match hnuhnung paliah goal ruk a khung tawh!

Minute 22-na a ni a, Bellingham-a hun a inher chhuak. Kum 20 midfielder hian David Alaba ball cross chu goal-ah a chantir a, Real-in 2-1 a hmahruai chungin chawlhlawk an hman theih phah. Mahse, Napoli an zam duh bik lo. Second half ṭan aṭanga minute hnihna lekah Anguissa hmangin si phurh an sut ve leh a, 2-2 a ni.

Mahse, Real chu Real nge nge an ni - Argentina international hlui Pablo Paz-a fapa, kum 19 mi Nico Paz chuan minute 84-naah hmahruaina goal a khung leh a, hun pek belhah Joselu chuan chak nemnghehna a khung ve leh bawk.

Bellingham bawk

Pound maktaduai 88-a Real Madrid pantu Bellingham hming lam rik a ngai leh ṭhin a, hawisan hleihtheih a ni lo - Napoli lakah mawi zetin goal a tauh lut a, Spanish club tan match 16-ah goal 15 a khung der!

Season hmasa lawka Bundesliga Player of the Season hian Dortmund tan season hmasa khan goal 14 a khung a, tunah Real jersey ha chungin a khum der tawh! Santiago Bernabeu-a a che vel chu hmuhnawm tak a ni.

Bellingham hian goal a khung bakah Joselu khung tur chu a siamsak a, a ball pek a ṭhain a mawi takzet - Antonio Rudiger tana a siamsak, German defender-in a khung tak loh pawh uiawm a tling a, Napoli keeper Alex Meret chuan ṭha zetin a dang.

Real manager Carlo Ancelotti chuan, "Jude hi awlsam takin box chhungah a lut ṭhin a, motorbike ang mai a ni. Heti em ema rang hian he hmunah hian a tlangnel nghal ang tih tumahin an ring lo a, fans, a khelhpui leh kan elpui thlengin mak tiin a awmtir tawp mai a ni," a ti a, a player a fak hle.

Lung a leng!

World Cup 1998 kha in en hlawm em? Khatihlaia nula tlangval ni ngat chunga World Cup en, tuna la nula tlangval tan chuan 'neih' a hun ve ta hle - Nilaini zana Real leh Napoli inkhelah khan World Cup 98-a Argentina tana inlan player pahnihte fa chu an inhmachhawn!

Napoli tana goal hmahruai khungtu Giovanni Simeone kha Diego Simeone fapa a ni a, Simeone hi kum 28 mi niin Argentina tan pawh vawi ruk a inlan tawh - an ram a chhuahsan hnuah Serie A club tan vek a la khel a, Napoli tan hian season hmasa aṭang khan a khel.

A pa Diego Simeone a lar em avangin ngaihven a hlawh tawk lo a, Diego Simeone hi World Cup 1998-ah khan Argentina captain niin, kha squad-ah khan khatihlaia kum 25 mi Pablo Paz a tel ve bawk.

Real goal thumna khungtu Paz kha Pablo-a fapa hi a ni a, kum 19 mi lek a ni. A pa khelh ṭhinna Tenerife aṭanga inzirin Real academy a zawm a, November 8 khan Real tana a match hmasa ber a khel ve chauh - a hma hun a êng hle.