Goal sur tirtu Arsenal

Arsenal chuan Champions League lamah pawh a tikimtu ni satliah loin, team ṭha zinga mi an nihna a takin an lantir - Lens 6-0 in an sawp a, khelh hmabak pakhat la nei chungin last 16 an lut a ni satliah lo; Group B hmahruaitu an ni chiang der tawh.

Gunners hian kum sarih hnuah UCL group stage an paltlang leh ta a, an tan hun lawmawm a ni. North London club bakah hian PSV Eindhoven leh Sevilla te erawhin European football inelna sang ber an mangṭha a ngai.

Inkhel dangah PSV Eindhoven chuan goal hnih an phurh hmasak hnuin Sevilla chu 3-2 in an lehthal. La Liga lama hnawhchhuah Sergio Ramos chuan Spanish club tan goal hmahruai khung mah se an chak ta lo.

Goal a sur

Emirates Stadium a ni bawk a, team ṭha zawk an nih avangin Mikel Arteta naute rinkai zawk an ni, chutihrualin khualmuala an mualpho tawhna a nih avangin Ligue 1 club hi zuam ngawt chi erawh an ni bik lo.

An mualpho tawhna hliahkhuh duh an ni bawk a, anmahni mualah meuh chuan Arsenal an rapthlak ngei mai. Kai Havertz, Gabriel Jesus, Bukayo Saka, Gabriel Martinelli leh Martin Odegaard ten chawlhlawk hmain goal an khung hman der tawh a, chak tur a chiang nghal vek tawh.

English team zingah UCL bikah chuan chawlhlawk laia goal ngaa hma hruai thei hmasa ber an ni a, English chauh ni loin ram dang club nena chhut pawhin first half chhunga goal khungtu panga awm thei hmasa ber an ni hial bawk.

Second half-ah pawh inkhel an thunun a, hlauhthawnna tur an nei lo. Midfielder Jorginho chuan an goal rukna khungin an chak a nemnghet. France rama an tlawm tawhna chu an chhanglet chiang hle a, an elpui lakah zahngaihna an lantir lo.

Beisei aia sang

Goal ruk faia an chak hnuah Arsenal manager Arteta chuan, “Hetiang em em chu ka suangtuah phak baka sang a ni. Ka naute khan a tir aṭangin chak an duhna kha sang takin an lantir a, a tir lam minute 30 chhungin kan tan kawng dik a inhawng nghal vek,” a ti.

Premier League lama Brentford an hnehna goal awmchhun khungtu Kai Havertz chu inkhel bul ṭantu zingah telh a ni a, tun ṭumah pawh goal khungtu a ni leh a, a goal hmahruai chu Arsenal boruak tisanga tiphurtu a ni bawk.

Arteta chuan, “Goal a khung a, a khel ṭha hle bawk - hei hi thil lawmawm chu a ni. A ṭhiante leh fans kha a lamah an ṭang tlat a, mipui lamin an hming an lam rual dual dual kha a hlu hle ang,” tiin Havertz chungchang a sawi a, hun harsa an paltlang chu lawmawm a ti hle.

Jesus leh captain Odegaard ten an dam chiang a ni tih goal hmangin an lantir thei a, a ṭha sa Saka leh Martinelli te ke a hmui zel bawk - Inrinni zana Wolves nen Premier League an khelh tur atan pawh inrintawkna an nei sang khawp ang.