Wolves sporting director an hrem

Premier League club Wolverhampton Wanderers sporting director Matt Hobbs chu referee Anthony Taylor laka ṭawngkam mawi lo tak a hman avangin hrem a ni a, £4,000 (Rs. 4,21,802) chawi tura tih a nih bakah match khat inkhel a en a rem lo ang.

Wolves hian October thla tawp lamah khan an mikhual Newcastle United chu sawisel theih takin 2-2 in an inhnehtawkpui a, referee thutluknaa lungawi lo Hobbs hian na takin inkhel enkawltute chu a sawisel.

Referee Taylor hian a chunga Hobbs chet dan hi a report-ah ziak telin, Wolves Director hian, "Ngaihdam inrawn dil leh thuai kan beisei," tiin a lo tihel a ni.

Hobbs hi FA chuan tun thlatir khan referee laka mawi lo taka a chet avangin thubuai an siamsak a, he thubuai chhuitu independent regulatory commission chuan Hobbs hian Taylor chu, "Mi hman tlak loh," tiin a an khum niin an sawi.

Molineux-a Wolves leh Magpies inkhelah khan 1-1 a nih laiin Newcastle chu penalty pek an ni a, video assistant referee rei tak rawn a nih hnuah an kaltlangpui - Callum Wilson chuan goal-ah a chantir a, 2-1 a ni.

Taylor hian VAR ngaichang mah se, khelmual sira monitor en loin thutlukna a siam a, Wolves boss Gary O'Neil chuan,"Thutlukna dik lo hulhual a ni," tiin a sawi hial a, Premier League referee hotupa Howard Webb chuan a hnuah, "Khelmual sira VAR kha rawn ngei tur a ni," tiin a sawi leh si!

Wolves hi season ṭantira Manchester United nen an inkhelh ṭumin, sawisel theih takin pek an lo ni lo tawh a, English football-a referee pawl Professional Game Match Officials Board (PGMOL) chuan ngaihdam an lo dil tawh bawk.

Thawhṭanni zan khan Wolves hi an vanduai nawn leh a, sawisel theih takin Fulham chu 3-2 in an ngam lo. Craven Cottage-a an chak loh hnu lawkah hian O'Neil chuan, "Zanina thil thleng hian VAR duh lo turin ka rilru min hminsak ta hialah ka ngai," tiin a sawi.