Santosh Trophy final round : Group khatah Mizoram leh Manipur

Nimin khan 77th National Football Championship for Santosh Trophy final round draw chu neih a ni a, Mizoram chu Manipur nen group khatah dah an ni. Final round hi February - March, 2024 hian Arunachal Pradesh-ah khelh a ni ang.

Kumin October thla khan India ram hmun hrang hrangah qualifying round khelh a ni a, chutihrualin inelna thlengtu Arunachal Pradesh bakah nikum finalist Meghalaya leh Karnataka te chu tling sa an ni.

Mizoram hi group stage-ah Services nen an awm kawp a, National Games-ah Services hian gold medal an la zui. National Games football-a pakhatna Services leh Mizoram hi group khatah dah kawp theih an ni tawh lo.

Group A-ah inelna thlengtu Arunachal Pradesh, Meghalaya, Goa, Assam, Services leh Kerala te an awm a, group B-ah Mizoram bakah champion lai Karnataka, Maharashtra, Delhi, Manipur leh Railways te an awm ve bawk. Group khat aṭangin team hnih ve vein semifinal an lut ang.

Mizoram hi coach Lalsangzuala Hmar leh manager K. Lalenghluna (Maenga) ten an ho a, October thla khan Amritsar-ah inelna an hmachhawn. Match hmasa berah Mizoram hian Services hneh lo mah se a hnu lam match liah an chak vek. Coach Sanga hote hian DNH&DD (5-0), Sikkim (1-0), Uttarakhand (1-0) leh Pondicherry (6-0) te an hneh a, match hnuhnung paliah hian goal an chhuah lo.

Santosh Trophy-ah hian inelna ṭan hmain player hming 40 an thehlut a, heng an thehluh aṭang hian player 22-in group stage an khel. Final round-ah hian squad a siksawi a, AIFF-in inelna kalphung an thlak a nih ngawt loh chuan player 40 aṭang chauhin squad hi a siksawi theih.